Sirdaryo viloyati Sirdaryo tumani hududida 8-sentabr kuni hojatxona qog‘ozi olib ketayotgan yuk mashinasida yong‘in yuz berdi. Bu haqda Favqulodda vaziyatlar vazirligi xabar berdi.
Ma’lum qilinishicha, voqea 8-sentabr kuni soat 15:20 da Toshkent — Dushanbe xalqaro avtomagistralining 83-kilometrida sodir bo‘lgan.
Qayd etilishicha, “KamAz” rusumidagi yuk avtomobili bortida olib ketilayotgan hojatxona qog‘ozi kutilmaganda yonib ketgan. Uch daqiqa ichida hodisa joyiga hududiy Favqulodda vaziyatlar boshqarmasi yong‘in-qutqaruv xizmati xodimlari yetib kelgan va 10 daqiqa ichida yuzaga kelgan yong‘inni bartaraf etgan.
Ta’kidlanishicha, qutqaruvchilarning tezkor harakatlari natijasida yukning yarmini saqlab qolishga erishildi. Hozirda mutaxassislar tomonidan yong‘in sabablari o‘rganilmoqda.