RM Sotheby’s kimoshdi savdolar uyi noyob Mercedes-Benz SLR McLaren Stirling Moss’ni sotuvga qo‘ydi. Karbon kuzovga ega ikki eshikli mashina 8,5 ming kilometr yo‘l bosgan bo‘lib, unga oxirgi marotaba 2020-yilning fevralida texnik xizmat ko‘rsatilgan. Mazkur spidster 1,9-2,2 million yevroga baholanmoqda, deb xabar berdi Motor.

Foto: RM Sotheby’s

Sotuvga qo‘yilgan Mercedes-Benz SLR McLaren Stirling Moss — britaniyalik taniqli poygachi Stirling Moss sharafiga 2009-yili 75 nusxada ishlab chiqarilgan spidsterlardan biri hisoblanadi. Original kuzovga ega ikki eshikli mashina faqatgina oddiy kupe va SLR rodsterlari egalariga sotilgan bo‘lib, bundan 10 yil oldin uning narxi 1,2 million yevro turgan.

O‘tgan davr mobaynida SLR McLaren Stirling Moss uch marotaba “yashash joyini” o‘zgartirgan: superkarning birinchi egasi Lyuksemburgda yashagan, ikkinchisi — Yaqin Sharqda yashagan kolleksioner bo‘lgan. Avtomobilni sotuvga qo‘ygan hozirgi egasi esa Germaniyada istiqomat qiladi. 2012-yilda spidster Mille Miglia poygasida ishtirok etgan bo‘lsa-da, u hozirga qadar 8,5 ming kilometr yo‘l bosgan.

Foto: RM Sotheby’s

SLR McLaren Stirling Moss texnik jihatdan SLR 722 Edition’ni takrorlaydi, biroq 5,4 litrli V8 kompressor kuchi oshirilib, 660 ot kuchiga yetkazilgan. Kompozit kuzov esa mashina og‘irligini 200 kilogrammga tushirishga yordam bergan. Spidster soatiga 100 kilometr tezlikka 3,5 soniyada erisha oladi, maksimal tezligi esa 350 km/soatga teng.

SLR McLaren Stirling Moss narxi o‘n yil ichida ikki barobarga oshgan: RM Sotheby’s bo‘yicha uning narxi 2,2 million yevroga yetishi mumkin. Biroq 14—22-iyul kunlari o‘tkazilgan savdolarda noyob spidsterga xaridor chiqmagan.

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s

Foto: RM Sotheby’s