Toshkentning Sergeli tumanidagi bolalar va o‘smirlar sport maktabi hududida tumanda istiqomat qilayotgan fuqarolarni koronavirus infeksiyasidan himoya qilish maqsadida tez yordam markazini bitkazish ishlari yakuniga yetib qoldi. Bu haqda tuman hokimligi matbuot xizmati xabar berdi.
Ma’lum qilinishicha, 250 o‘ringa mo‘ljallangan hudud kasallikning oldini olish, davolash jarayonlarini amalga oshirishga mo‘ljallangan.
“Ushbu ishlarni uyushgan holda tashkil etishda Sergeli tumani hokimligining mutasaddi xodimlari, tuman obodonlashtirish boshqarmasidan biriktirilgan ishchi-xizmatchilar ham faol ishtirok etmoqda”, — deyiladi xabarda.
Avvalroq Samarqanddagi “Registon” mehmonxonasida COVID-19’ga gumon qilinganlarni saqlash va taqsimlash markazi tashkil etilgani to‘g‘risida xabar berilgandi.
Eslatib o‘tamiz, Toshkent shahridagi “O‘zekspomarkaz” ko‘rgazma markazi maydonlarida koronavirusga chalingani gumon qilingan bemorlarga aniq tashxis qo‘yish va kasallik darajasini aniqlash, shuningdek, bemorlarga birinchi yordam ko‘rsatish va ularni klinikalarga taqsimlash markazi tashkil etildi. Taqsimlash markazi 500 o‘ringa mo‘ljallangan bo‘lib, u yerga tibbiyot xodimlarini ishga qabul qilish jarayoni boshlangan.
Izoh (0)