Disney multfilmlaridagi malikalar kelin ko‘ylaklari kolleksiyasi sotuvga chiqarildi (foto)

Disney Weddings agentligi, Allure Bridals kelin liboslari saloni bilan hamkorlikda Disney Princess liboslar kolleksiyasini taqdim etdi. Bu haqda Elite daily nashri xabar berdi.

Ta’kidlanishicha, kolleksiya Disney multfilmlaridagi malikalar — Bell, Jasmin, Ariel, Pokaxontas, Rapunsel, Tiana, Oppog‘oy, Avrora va Sindrella obrazlaridan ilhomlanib yaratilgan.

Cindrella libosi shu nomli multfilmning 70 yilligi munosabati bilan yaratilgan bo‘lib, malikaning billur poyabzalini yodga soluvchi 4600 dan ziyod kristallar bilan bezatilgan.

Kolleksiyadan klassik qirollik liboslaridan tortib, qomatni aks ettiradigan turli bichimdagi 16 bejirim libos o‘rin olgan. Har bir libos turli uzunlikdagi shleyf, marvarid va biserlar, tosh va naqshlar bilan bezatilgan.

“Dizaynerlardan iborat jamoamiz har bir libos ustida tinimsiz ishladi. To‘plamdagi liboslar Allure va kelinlar uchun sevimli hamda taniqli bo‘lgan va malikalar libosidan ilhomlanib yaratilgan. Disney bilan hamkorlik qilish, ertaklarning reallikka aylanishini kuzatish biz uchun sharaf ”, — deydi Allure Bridals rahbari Kelli Kram.

Uzoq kutilgan liboslar to‘plami ikki qismdan iborat. Birinchi asosiy The Disney Fairy Tale Weddings kolleksiyasidan 9 libos o‘rin olgan bo‘lib, undagi boshlang‘ich narx 1200 dollarni tashkil qiladi. The Disney Fairy Tale Weddings Platinum kolleksiyasidagi liboslar narxi esa 3500 dollardan boshlanib, faqatgina Kleinfeld Bridal do‘konlarining Nyu-York va Toronto filiallarida sotuvga qo‘yiladi.