Koronavirusga chalingan Buyuk Britaniya bosh vaziri Boris Jonson intensiv terapiya bo‘limini tark etdi. Bu haqda Britaniya hukumati kanselyariyasiga tayanib, “RBK” xabar berdi.

Foto: AP Photo

“Bugun kechasi bosh vazir intensiv terapiya bo‘limidan oddiy palataga o‘tkazildi, uning sog‘lig‘i tiklanishining dastlabki bosqichida nazorat ostida bo‘ladi”, — deyiladi xabarda.

Boris Jonson koronavirus bilan kasallangani haqida 27-mart kuni ma’lum bo‘lgandi. 5-aprel kuni u ehtiyot chorasi sifatida avliyo Foma shifoxonasiga yotqizilgan. Biroq keyinroq siyosatchining sog‘lig‘i keskin yomonlashib, jonlantirish bo‘limiga o‘tkazilgan edi.

Avvalroq Boris Jonsonni epidemiya xavfidan ogohlantirgan shifokorning o‘zi koronavirusdan vafot etgani ma’lum bo‘ldi.

So‘nggi ma’lumotlarga ko‘ra, Buyuk Britaniyada koronavirus bilan kasallanganlar soni 65 ming kishidan oshgan, qariyb 8 ming odam vafot etgan.