Xitoyda yangi turdagi koronavirusni yuqtirish holatlari kundan kunga kamayib bormoqda, deb yozadi “RIA Novosti”.
Xitoy sog‘liqni saqlash milliy komissiyasining ma’lumotlariga ko‘ra, koronavirus bilan kasallaganlarning 77,7 foizi sog‘aygani uchun uyga ruxsat berilgan. Hozirgi vaqtda mamlakatda koronavirusdan o‘lim darajasi 3,9 foizni tashkil etmoqda.
Qayd etilishicha, Xitoy hududida koronavirusni yuqtirganlarning umumiy soni 80 793 kishini tashkil etib, ulardan 62 793 nafari sog‘ayishga muvaffaq bo‘lgan.
Epidemiya boshlanganidan beri Xubeyni hisobga olmaganda, butun Xitoyda 13 012 ta kasallanish holati qayd etilgan. Ulardan 113 tasi o‘lim bilan yakunlangan. O‘lim darajasi 0,86 foizni tashkil etgan.
Epidemiya o‘chogi hisoblanmish Xubeyning o‘zida 67 781 nafar bemor qayd etilgan, ulardan 3056 kishi vafot etgan. O‘lim darajasi hududda 4,5 foizni tashkil etagn.
Uxan shahrida esa kasallikdan vafot etish darajasi 4,86 foizni tashkil etgan.
Epidemiya hammasi bo‘lib mamlakatning 3169 fuqarosini hayotdan olib ketgan.
So‘nggi vaqtda Xitoyda epidemiologik vaziyat yaxshilanmoqda. So‘nggi kunlarda butun mamlakat bo‘ylab koronavirusga chalinish bilan bog‘liq 15 ta yangi holat aniqlangan. Ulardan oltitasida koronavirus Xitoy tashqarisida yuqtirilgan, yana sakkizta holat esa Xubeyda qayd etilgan.
Avvalroq Xubey provinsiyasi rasmiylari ilgari kiritilgan cheklov choralari birmuncha yengillashtirilgan edi. COVID-19 infeksiyasini yuqtirish holatlarining soni sezilarli darajada qisqarishi fonida provinsiya hukumati o‘z fuqarolarining harakatiga taqiqni qisman olib tashlashga va jamoat transporti faoliyatini tiklashga qaror qildi.
Izoh (0)