Yagona interaktiv davlat xizmatlari portalida “Hayotiy vaziyatlar” bo‘limi ishga tushirildi. Bu haqda 13-fevral, payshanba kuni, Abu Rayxon Beruniy nomidagi respublika Biznes va boshqaruv oliy maktabi binosida o‘tgan taqdimot va brifingda ma’lum qilindi.

Foto: my.gov.uz

Foto: “My.gov.uz”

“My.gov.uz” portalida ishga tushirilgan “Hayotiy vaziyatlar” bo‘limi taqdimoti o‘tkazildi, bo‘limda ommabop davlat xizmatlaridan foydalanish tartibi to‘g‘risidagi ma’lumotlar hayotiy vaziyatlar tematik bloklariga guruhlangan. Hozirgi vaqtda bo‘lim quyidagi hayotiy vaziyatlarni o‘z ichiga olgan:

  • Farzand tug‘ilishi — homiladorlik bo‘yicha ro‘yxatdan o‘tish, homiladorlik va tug‘ish ta’tiliga chiqish, ta’til muddati, suyunchi miqdori, tug‘ruqxona xizmatlaridan foydalanish tartibi;
  • Mehnat munosabatlari — ish qidiryapman, ishga kirishda hujjat rasmiylashtirilishi, ishsizlik nafaqasi, malaka oshirish va qayta tayyorlovdan o‘tishda davlat xizmatlaridan foydalanish;
  • Oila qurish va oilani tugatish — nikohni rasmiylashtirish, nikoh yoshiga yetmagan shaxs bilan nikoh tuzish, nikoh shartnomasi va uni tuzish, nikohni bekor qilish;
  • Pensiya rasmiylashtirish va uni olish — ish staji hisoblanishi, tasdiqlovchi hujjatlar, pensiyani boshqa turiga o‘zgartirish, ishlovchi pensionerga pensiya to‘lovi;
  • Yashash joyida propiska qilish va ro‘yxatdan o‘tish — doimiy propiskani olish, propiskadan chiqish, yashash joyi bo‘yicha vaqtincha ro‘yxatga qo‘yish;
  • Ta’lim — bolani bog‘chaga berish, maktabga qabul qilish, imtiyozlar, Prezident maktablari, oliy o‘quv yurtiga kirish, magistraturada o‘qish;
  • Nogironlarning ijtimoiy himoyasi — nogironlikni rasmiylashtirish, mezonlar, nogironligi bor shaxslar uchun nafaqa, pensiya va imtiyozlar.

Matbuot brifingida O‘zbekiston aholisi tomonidan eng talabgir bo‘lgan hayotiy vaziyatlardan iborat mazkur bo‘lim xalqaro tajribadan kelib chiqqan holda hamda YaIDXP foydalanuvchilari tomonidan taklif etilgan ommaviy xizmatlar reytingi tahlillari asosida ishlab chiqilganligi ta’kidlab o‘tildi. Mazkur bo‘limning ishga tushirilishi arizachi muammosini turli vazirlik va idoralarga murojaat qilish kabi alohida qismlarga ajratmasdan yaxlit tarzda hal qilish imkonini beradi.

Foto: O‘zbekiston Respublikasi Prezidenti huzuridagi Loyiha boshqaruvi milliy agentligi

Davlat xizmatlarini “hayotiy vaziyatlar” bo‘yicha guruhlashtirish amaliyoti dunyo mamlakatlarida keng tarqalgan. Masalan, Kanada va AQSh (17 ta hayotiy vaziyat), Buyuk Britaniya (16), Avstraliya va JAR (14), Fransiya (11), Rossiya (9) va Estoniya (6) portallarida ushbu prinsip qo‘llanilgan. Ushbu mamlakatlarda “farzand tug‘ilishi”, “nafaqaga chiqish”, “ish izlash”, “o‘lim” kabi hayotiy vaziyatlar taqdim etilgan.