O‘zbekiston Markaziy banki tomonidan banklarning veb-saytlari yuritilishi yuzasidan o‘rganish o‘tkazildi. Natijada, ayrim banklar axborotlarni oshkor qilishga doir talablarga lozim darajada amal qilmaganligi aniqlandi. Bu haqda Markaziy bank tomonidan ma’lum qilindi.

Foto: “Review.uz”

Markaziy bankning qayd etishicha, ayrim banklarning veb-saytlarida quyidagi kamchiliklar mavjud:

  • dolzarb ma’lumotlar joylashtirilmagan;
  • xizmatlar haqidagi ma’lumotlar yangilanmagan yoki taqdim etilayotgan xizmatlarning shartlari to‘liq keltirilmagan;
  • potensial qarz oluvchilar uchun kreditning to‘liq qiymatini mustaqil ravishda hisoblash imkoniyati yaratilmagan;
  • qarz oluvchilar uchun shaxsiy kabinet ochish imkoniyati mavjud emas;
  • murojaatlarni yuborish uchun imkoniyatlar yaratilmagan.

10-yanvar, juma kuni Markaziy bank tomonidan tijorat banklari vakillari bilan banklar faoliyati va ular tomonidan taqdim etilayotgan xizmatlar to‘g‘risida o‘z vaqtida, to‘liq va ishonchli ma’lumotlarni e’lon qilish masalalari bo‘yicha uchrashuv o‘tkazildi. Uchrashuvda qayd etilishicha, banklarning o‘z xizmatlari to‘g‘risidagi axborotlarni oshkor qilishi iste’molchilarning ishonchli va to‘liq ma’lumot olish huquqini ta’minlaydi, uning oshkor qilinmasligi esa bank faoliyatida yo‘l qo‘yilgan qo‘pol qoidabuzarlik hisoblanadi.

Shu munosabat bilan korporativ veb-saytlar orqali ma’lumotlarni oshkor qilishda qoidabuzarliklarga yo‘l qo‘ygan banklarga ularni bartaraf etish bo‘yicha ko‘rsatmalar berildi.

Markaziy bank tomonidan ta’kidlanishicha, “Banklar va bank faoliyati to‘g‘risida”gi qonunga muvofiq, bank xizmatlaridan foydalanuvchilar bank va bank xizmatlarini tanlashda erkindir. Banklar esa shartnoma tuzishdan oldin iste’molchilarga bank xizmatlaridan foydalanish shartlari bilan tanishish imkoniyatini ta’minlashi shart.

Shu bilan birga, bank xizmatlarini taqdim etishning umumiy shartlari, komissiya to‘lovlari, tariflar va bank xizmatlari uchun foiz stavkalari to‘g‘risidagi ma’lumotlar ochiq ma’lumotlar bo‘lib, bankning rasmiy veb-saytida e’lon qilinadi.