Andijon viloyatining Asaka tumanida 50 yoshli erkak xotini va 18 yoshli qizini pichoqlab o‘ldirdi. Bosh prokuratura matbuot xizmatining “Daryo”ga xabar berishicha, voqea 16-dekabr kuni soat 02:00 larda yuz bergan.
Ma’lum bo‘lishicha, fuqaro H.A. 50 yoshli turmush o‘rtog‘i D.A. va 18 yoshli qizi X.X.ning doimiy e’tirozlaridan charchab, ulardan o‘ch olish maqsad qilgan.
U turmush o‘rtog‘i uxlab yotganligidan foydalanib, pichoq bilan ko‘krak qismiga 3 marotaba va biqin qismiga 2 marotaba urib, qasddan o‘ldirgan. So‘ng, qizini oldiga go‘yoki kiyimlarini topib berishini aytib chaqirib, pichoq bilan ko‘krak qismiga 1 marotaba, biqin qismiga 5 marotaba, tanasining orqasiga 9 marotaba va bilak qismiga 3 marotaba urib, qasddan o‘ldirgan.
Mazkur holat yuzasidan shu kuni tuman prokuraturasi tomonidan H.A.ga nisbatan Jinoyat kodeksining 97-moddasi 2-qismi “a” bandi (Ikki yoki undan ortiq shaxsni qasddan o‘ldirish) bilan jinoyat ishi qo‘zg‘atilgan.
