15—16-oktabr kunlari O‘zbekiston Qurolli Kuchlari akademiyasida “Hozirgi zamon harbiy mojarolari: mazmuni va xulosalari” mavzusida xalqaro ilmiy-amaliy konferensiya bo‘lib o‘tadi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Qurolli Kuchlar akademiyasi hamda Toshkent shahridagi Yevropada xavfsizlik va hamkorlik tashkiloti loyihalarining Koordinatori ko‘magida tashkil etilayotgan konferensiyada harbiy mojarolarni hal qilishning zamonaviy usullari va yondashuvlari bo‘yicha milliy va xalqaro tajribalarni umumlashtirish, ilmiy tadqiqotlar o‘tkazish hamda harbiy kadrlarni tayyorlash sohasida xalqaro hamkorlikni kengaytirish masalalari muhokama qilinadi.
Mazkur konferensiya harbiy mojarolarning paydo bo‘lish tabiati, ularni bartaraf qilishning samarali choralari, cheklash va eskolatsiyaga yo‘l qo‘ymaslik masalalari bo‘yicha tajriba va axborot almashish uchun keng diskussiya maydonini yaratish, hozirgi zamon harbiy mojarolarida, harbiy san’at rivojlanishidagi yangi tendensiyalarga yagona qarashlar va yondashuvlarni yaratish maqsadida o‘tkazilmoqda.
Konferensiyada O‘zbekistondagi YeXHT, BMT vakillari va ekspertlari, YuNISEFning O‘zbekistondagi vakolatxonasi, Xalqaro Qizil xoch qo‘mitasining mintaqaviy delegatsiyasi, MDH, ShHT MATT, NATO, Jorj Marshall nomidagi Xavfsizlik masalalarini o‘rganish Yevropa markazi, AQSh Milliy mudofaa universiteti qoshidagi Yaqin Sharq va Janubiy Osiyo Strategik tadqiqotlar markazi, Ozarbayjon, Belarus, Buyuk Britaniya, Germaniya, Hindiston, Italiya, Qozog‘iston, Xitoy, Janubiy Koreya, Qirg‘iziston oliy harbiy ta’lim muassasalari vakillari qatnashadi.
Konferensiya bitta yalpi majlis, 4-mavzuviy seksiyalarda ish olib borish va xulosa chiqarish uchun yakuniy majlisni o‘z ichiga oladi.
Konferensiyada ishtirok etish uchun to‘ldirilgan talabnoma va ma’ruzani quyidagi elektron manzilga jo‘natish zarur, e-mail: akaduz@umail.ru yoki akaduz@yandex.ru
Konferensiya ishtirokchilarini ro‘yxatga olish 15-oktabr kuni soat 8:30 dan 09:00 gacha Qurolli Kuchlar akademiyasining katta majlislar zalining foyesida o‘tkaziladi.
Izoh (0)