Barbi qo‘g‘irchoqlari ishlab chiqaruvchi Mattel kompaniyasi yangi gender-neytral qo‘g‘irchoqlarni sotuvga chiqardi. To‘plam “Yaratuvchan olam” (Creatable World) nomini oldi. Bu haqda TJournal xabar berdi.
Foto: TJournal
To‘plamga turli irq, tana va bo‘y uzunligiga ega oltita qo‘g‘irchoq kiritildi. Ularga turli kiyim, parik va oyoq kiyim tanlash mumkin. Bu esa qo‘g‘irchoqlarning jinsi va imijini o‘zgartirish imkonini beradi.
“Yangi modellarning o‘ziga xos jihati shundaki ularning obrazi gender me’yorlari bilan belgilanmagan”, — deyiladi xabarda.
Kompaniya bolalarning istaklarini o‘rganib chiqdi. Tadqiqotlarga ko‘ra, o‘smirlar gender yo‘naltirilgan o‘yinchoqlarni sotib olishni xohlamaydi.
Avvalroq, barbi qo‘g‘irchoqlarini ishlab chiqaruvchi Mattel kompaniyasi yangi gender-neytral qo‘g‘irchoqlar chiqarishi haqida xabar berilgandi. Kompaniya yangi o‘yinchoqlar alohida brend bo‘lib, barbi qo‘g‘irchoqlariga aloqasi yo‘qligini ma’lum qilgan.
Mattel xodimi Kim Kalmounning aytishicha, yangi qo‘g‘irchoqlar liniyasi yordamida kompaniya o‘yinchoqlarni yorliqlardan holi qilishni xohlaydi.
