Toshkent viloyati IIBB YHX boshqarmasining joylardagi bo‘limlari tomonidan majburiy texnik ko‘rik yakunlari tahlil etildi. Bu haqda “Daryo”ga boshqarma matbuot xizmati ma’lum qildi.

Foto: Toshkent viloyati IIBB YHXB

Tahlil yakunlariga ko‘ra, 319 ta turli rusumdagi transport vositaci 2019-yilgi majburiy texnik ko‘rikka taqdim etilmaganligi aniqlandi. Shundan 85 tasi ta’mirtalab holda ekanligi, 60 tasi transport vositasidan foydalanishga ehtiyoj yo‘qligi sababli fuqaroning uyida turganligi, 30 tasi noma’lum sabablarga ko‘ra, 68 tasi hozirda vaqtinchalik jarima maydonchasida saqlanayotganligi hamda 76 tasi foydalanish uchun yaroqsiz holda bo‘lganligi sababli texnik ko‘rikka taqdim etilmaganligi ma’lum bo‘ldi.

Foto: Toshkent viloyati IIBB YHXB

Joriy yil sentabr oyi 10 ish kuni mobaynida bir va ikki yildan ortiq muddatda texnik ko‘rikdan o‘tmagan 20 ta transport vositasi majburiy texnik ko‘rikka taqdim etilishi ta’minlandi. Foydalanish uchun yaroqsiz holga kelgan 15 ta transport vositasi YHX xizmati ro‘yxatidan o‘chirildi, yana 18 ta transport vositasini ro‘yxatdan o‘chirish uchun tegishli hujjatlar rasmiylashtirildi.

Foto: Toshkent viloyati IIBB YHXB

Olib borilgan tadbirlar davomida majburiy texnik ko‘rikka taqdim etilmasdan harakatlanayotgan 5 ta, texnik nosoz holda bo‘lgan 2 ta transport vositasi haydovchilariga nisbatan ma’muriy bayonnomalar rasmiylashtirildi.

Toshkent viloyati IIBB YHX boshqarmasining joylardagi bo‘limlari tomonidan mazkur yo‘nalishdagi chora-tadbirlar davom ettirilmoqda.