Kattaqo‘rg‘ondagi Moybuloq tug‘ruqxonasi yopilgani homilador ayollar uchun qiyinchilik tug‘dirayotgani aytilgan edi. SSV holat yuzasidan o‘rganish o‘tkazdi

Ijtimoiy tarmoqlarda “Qishloq tug‘ruqxonasi yopilib, ayollar uyda tug‘ishga majbur bo‘lmoqda” sarlavhasi ostida Kattaqo‘rg‘on tumanidagi “Moylisoy” va “Qoqsoy” QFY ayollariga xizmat ko‘rsatib kelgan Moybuloq tug‘ruq bo‘limining olti oy avval yopilishi hududdagi homilador ayollar uchun jiddiy qiyinchilik tug‘dirayotgani aks etilgan videolavha tarqalgan edi.

Sog‘liqni saqlash vazirligi jamoatchilik bilan aloqalar bo‘limining xabar berishicha, materialdagi holat Samarqand viloyati sog‘liqni saqlash boshqarmasi tomonidan atroflicha o‘rganildi.

Kattaqo‘rg‘on tumani tibbiyot birlashmasiga qarashli tug‘ruq majmuasi 100 o‘rindan iborat bo‘lib, shundan 15 ta o‘rin Moybuloq tug‘ruq bo‘limiga ajratilgan. Ayni paytda tumanda tug‘ruqlar soni bir oyda o‘rtacha 351 nafarni tashkil qilsa, shundan Moybuloq tug‘ruq bo‘limiga hududdan murojaat qilganlar soni bor-yo‘g‘i 9 nafarni tashkil qilgan.

Aytish mumkinki, ijtimoiy tarmoqlarda tarqalgan yuqoridagi materialda 9000 nafar tug‘ish yoshidagi ayol yashovchi bu va unga tutash dasht qishloqlari tuman markazidan 30—40 kilometr masofada joylashgani bois to‘lg‘oq tutgan ayollar shahar tug‘ruqxonasiga yetolmay yo‘lda yoki uyida tug‘ishga majbur bo‘layotgani haqidagi iddaolar haqiqatdan yiroq.

Chunki Kattaqo‘rg‘on tumani tibbiyot birlashmasi tug‘ruq kompleksi bilan Moybuloq oilaviy poliklinikasi o‘rtasidagi masofa 14 kilometrdan ziyodroqni tashkil qiladi. O‘rganishlar natijasida 2018-yil davomida Moybuloq tug‘ruqxonasida amalga oshgan tug‘ruqlar kuniga bittadan ham to‘g‘ri kelmasligi aniqlandi. Tabiiyki bunday holatda, bu yerda tug‘ruqxona bo‘limini saqlab turish o‘zini oqlamaydi.

Moybuloq tug‘ruq bo‘limida shart-sharoitlar yo‘qligi mutasaddi tashkilotlar tomonidan o‘rganilib, hududda talabga javob bera oladigan qishloq oilaviy poliklinikasi borligi va bu yerda tug‘ruq uchun 4 o‘rinli bo‘lim ajratilishini inobatga olinib, Moybuloq tug‘ruq bo‘limi faoliyati to‘xtatilgan.

Qolaversa, joriy yilda viloyat Sog‘liqni saqlash boshqarmasi mutaxassislari bir necha marta mazkur hududga borib o‘rganishlar olib bordi. Unda qishloq oilaviy poliklinikasida tug‘ruq uchun yaratilgan sharoit va tez tibbiy yordam brigadalari bilan to‘liq ta’minlanganligi bois bu yerda tug‘ruq yuzasidan biron bir jiddiy muammo aniqlanmagan.

Bundan tashqari, hozirda Moybuloq hududi bo‘yicha 3 ta tez tibbiy yordam xizmati shoxobchasi tashkil etilgan bo‘lib, tog‘li hududlarda yurishga mo‘ljallangan zamonaviy avtomashinalar bilan ta’minlangan. Hudud aholisi sifatli patronaj xizmati bilan to‘liq qamrab olingan. Bu esa hududdagi aholining tibbiy xizmatdan samarali foydalanish imkonini beradi. Shu bilan birga tuman tibbiyot birlashmasi shifokorlari Moybuloq hududidagi nafaqat homilador ayollar, balki aholini ham muntazam ravishda tibbiy ko‘rikdan o‘tkazib kelmoqda, deyiladi xabarda.