Biz shunday zamonda yashayapmizki, unda Harri Maguayr 90 million yevroga sotiladi. O‘z darvozasiga avtogollar urib qo‘yadigan Kalidu Kulibali esa 200 million yevrodan kam turmaydi. Hozir esa rekord darajadagi transferlarni yodga olmaymiz. Aksincha, dunyo futbolida mo‘maygina pul sarflangan, shu bilan o‘zini oqlagan futbolchilar transferi haqida biroz mulohaza yuritamiz.

Qayd etish joiz, biz ham vaqtida ularni sotib olgan klublarni ortiqcha pul sarflaganlikda ayblab qo‘yganmiz. Afv etgaysiz, aziz muxlis!

Virjil van Deyk: “Sauthempton”dan “Liverpul”ga, 2018-yil — 75 million funt

Foto: Getty Images

2018-yilda “Liverpul” dunyo futbol ahlini o‘ziga xos bo‘lmagan transfer bilan hayratga soldi. Mersisayd klubi himoyachi Virjil van Deyk uchun 75 million funt to‘ladi. Ahmoqona pul sarflash bo‘lganmidi? Ko‘pchilik kutgandek bo‘lmadi. 1 yil o‘tib, “Liverpul” qoyilmaqom transferni amalga oshirgani ma’lum bo‘ldi. Niderlandiyalik futbolchi “qizillar” himoyasini shunchaki kuchaytirib qolmadi, balki uni butkul o‘zgartirishga erishdi. Jamoa u kelgunga qadar 2016/17-yilgi mavsum 42 ta gol o‘tkazgan bo‘lsa, Oradan bir yil o‘tib, jamoa bitta o‘yinda o‘rtacha 1,21 ta gol o‘tkazdi. 2018/19-yilgi mavsum esa ushbu raqamlar 0,66 foiz ko‘rsatkichiga tushdi. Jamoa butun mavsum davomida atigi 22 ta gol o‘tkazdi va APL tarixidagi eng yaxshi ikkinchi ko‘rsatkichni qayd etdi. Bularning hammasiga esa Virjil van Deyk boshchiligidagi himoyachilar va braziliyalik posbon Alisson sababchi bo‘lgani rad etib bo‘lmas faktga aylandi.

Didye Drogba: “Marsel”dan “Chelsi”ga, 2004-yil — 24 million funt

Foto: Getty Images

Joze Mourinyo “Chelsi”da ishlagan futbolchilari bilan keyinchalik ham birgalikda faoliyat olib borgan. Masalan — Rikardu Karvalyu. U bilan Joze uchta klubda birga ishlagan. Ammo Jozening eng omadli transferlaridan biri, shubhasiz, Drobga bo‘lgan. Portugaliyalik murabbiy kimni sotib olayotganini yaxshi bilgan va shu narsa klub xo‘jayini Roman Abramovichga ham tushuntira olgan. U shu yo‘sinda ish tutgan: “Janob Abramovich, pulni to‘lang va oshiqcha gapirmang”. Ammo Roman Abramovich murabbiyning o‘sha vaqtda haqligini qabul qilish oson kechmagan. Boisi 24 million funt o‘sha vaqtda katta pul edi. Drogba esa 1 yil oldin atigi 3,3 million funtga baholanar edi. “Marsel” ivuarlik futbolchini sotishni istamayotgan, ularga rad etib bo‘lmaydigan taklif berish kerak edi. “Chelsi” esa 24 million funtni qurtdek sanab berdi va xato qilmadi. Didye klubda 9 mavsumni o‘tkazdi va jamoaning haqiqiy yetakchisiga aylandi.

Dani Alvesh: “Sevilya”dan “Barselona”ga, 2008-yil — 28,5 million funt

Foto: Getty Images

Avvaliga Dani Alveshning transferi 23,5 million funt edi. Ammo “Barselona” agar Alvesh klubda muvaffaqiyatli to‘p surib ketadigan bo‘lsa, “Sevilya”ga yana 5 million berishga va’da berdi. Alvesh esa Kataloniya klubi bilan birga 16 ta sovringa ega chiqdi. Transferdan esa ikkala klub ham birdek xursand bo‘ldi. O‘z vaqtida The Telegraph nashri futbolchining “Manchester Yunayted” hamda “Chelsi” taklifini rad etgani va transfer summasi haddan tashqari yuqori bo‘lganini tanqid ostiga olgandi. Ammo Dani o‘z transferini ortig‘i bilan oqladi. Ko‘pchilik shundan so‘ng ushbu transferga bosh-qosh bo‘lgan Xosep Gvardiolani ayblashga ham botina olmadi.

Yaya Ture: “Barselona”dan “Manchester Siti”, 2010-yil — 24 million funt

Foto: Getty Images

“Ivuarlik — “Siti” safida haftasiga 200 ming funt oladigan o‘rtacha darajadagi o‘yinchi. U gol uradimi? Yo‘q. Vaziyatlar yaratadimi? Yo‘q. Yaxshi yarim himoyachimi? Ha, ammo de Yong, Viyeyra va Barrining o‘zi klubga yetadi” — degan endi vaqtida taniqli futbol eksperti Pol Merson. U hatto ushbu transferga 2 baho qo‘ygandi. Hozir esa Ture “Siti” tarixidagi eng yaxshi futbolchilardan biri sifatida yodga olinadi.

Kevin de Bryuyne: “Volfsburg”dan “Manchester Siti”ga, 2015-yil — 55 mln funt

Foto: Getty Images

Belgiyalik transferi amalga oshirilgan vaqtda ham Pol Merson yana diqqat markazida bo‘ldi. Bu safar u Jeff Stelling hamda Fil Tompsonlar bilan.

Fil: “De Bryuyne… Yo xudoyim, Jeff. Dunyo aqldan ozmoqda. Bunday narx evaziga ushbu futbolchini sotib olish o‘ta ketgan aqlsizlik. U yaxshi o‘yinchi, ammo buyuk emas-ku! “Volfsburg” — yaxshi jamoa, ammo jin ursin…”.

Jeff: “Merson, Mourinyo uni bekorga qo‘yib yubormagandir-a?”

Merson: “Hatto bunday deb o‘ylamayman ham. U “Chelsi”da nimagadir erishishi katta ehtimol edi. Uning 50 million funt turishiga ham ishonmayman. Nahotki, shuncha pul ingliz futbolida o‘zini ko‘rsata olmagan bola uchun to‘langan bo‘lsa?”.

Kevin keyin va hozir nimalar qilib tashlayotganini esa ko‘pchilik hayrat bilan kuzatishda davom etmoqda. Hatto Merson ham.

FourFourTwo materiali asosida Asror Abdunazarov tayyorladi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling