Farg‘ona shahrida Ziyovuddin Xaziniy uy-muzeyi ish boshladi. Bu haqda muzey xodimlari “Daryo”ga xabar berdi.

Foto: “Daryo”

O‘zbek mumtoz adabiyotining XIX – XX asrlardagi yirik vakili, Ziyovuddinxon Doniyolxon (Katta xoja) o‘g‘li Xaziniy to‘ra Eshon Xo‘qandiy 1867-yilda hozir Uchko‘prik tumani Katta Kenagas qishlog‘ida tavallud topgan. U umri davomida shu qishloq atrofida yashab, ijod qildi.

Ziyovuddinxon Xaziniy o‘zbek mumtoz she’riyat janrlaridan g‘azal, murabba’, muxammas va musaddaslar yozib, uning asarlaridan iborat “Xaziniy bayozi” kitobi XX asr boshida Toshkentda toshbosma usulida bir necha marta nashrdan chiqqan. Xaziniy nafaqat adabiyotda balki diniy ta’limotda ham benazir edi.

U Qo‘qondagi jome’ madrasasida tahsil olgan. Qur’on, tafsir, hadis, fiqh, kalom kabi ilmlarni ham chuqur o‘zlashtirgan. Tasavvuf ta’limotini bilan izchil shug‘ullangan. Xalq orasida “Eshon buva” nomi bilan e’zozlangan.

Xaziniy 1923-yilda vafot etib, shu qishloq yonidagi qabristonga dafn etilgan. Hozir ushbu qabriston obodonlashtirilib, Xaziniy qabri ustiga maqbara qurilgan.

Foto: “Daryo”

O‘zbekiston Prezidenti tashabbusi bilan Ziyovuddin Xaziniy to‘ra xotirasini abadiylashtirish bo‘yicha bir qator ishlar amalga oshirildi.

Xususan, viloyat Madaniyat boshqarmasi xodimlari tomonidan muzeyning ilmiy konsepsiyasi, muzey ekspozitsiyasining mavzuviy hamda muzey xodimlarining shtatlar jadvali ishlab chiqildi. Unga ko‘ra muzey ekspozitsiyasini badiiy bezash va muzey xududini obodonlashtirish ishlari olib borildi.

Foto: “Daryo”

Ushbu konsepsiyaga muvofiq Xaziniy davri va uning adabiy merosi bilan aloqador eksponatlar yig‘ilib, muzey ekspozitsiyasi 400 dan ziyod yangi eksponatlar bilan boyitildi. Eksponatlarning asosiy qismi Xaziniy davri tarixi va madaniyati bilan bog‘liq bo‘lib, ushbu buyumlar orqali XIX asr oxiri XX asr boshlaridagi tarixiy madaniy muhit aks ettirilmoqda.

Shuningdek, shoirning XX asr boshlaridagi she’riy devonlari, uning shaxsiy buyumlari hamda o‘zbek mumtoz adabiyotidagi boshqa namoyondalarining asarlari ham ekspozitsiyadan joy oldi.