Samarqand viloyatining barcha shahar-tumanlarida Samarqand viloyat IIB va viloyat prokuraturasining mas’ul xodimlari ishtirokida qidiruvdagi shaxslarning oila a’zolari bilan uchrashuv bo‘lib o‘tdi. Viloyat prokurorining birinchi o‘rinbosari Sirojiddin Eshquvvatov, viloyat IIB boshig‘ining birinchi o‘rinbosari Farhod Hasanov raisligida, joylardagi hokimlik, prokuratura, IIB rahbarlari va keng jamoatchilik ishtirokida o‘tkazilgan ochiq muloqotda qidiruvdagi shaxslarni o‘z vataniga qaytib kelishlari yuzasidan tushuntirish ishlari olib borildi.
Samarqand viloyat IIB Jinoyat qidiruv bo‘limining “Daryo”ga ma’lum qilishicha, yuqorida bayon etilgan tushuntirish ishlari natijasida Pastdarg‘om tuman IIB tomonidan qidiruvda bo‘lgan 44 nafar, Nurobod tumani IIB tomonidan qidiruvda bo‘lgan 19 ta shaxsning oila a’zolari bilan uchrashuvlar o‘tkazilgan. Olib borilgan tushuntirish ishlari natijasida qidiruvdagi shaxslarning ikki nafari o‘z ixtiyori bilan yashash manziliga qaytib kelgan.
Bundan tashqari Kattaqo‘rg‘on shahrida qidiruvda bo‘lgan 46 nafar shaxsning ikki nafari, Ishtixon tumanida qidiruvda bo‘lgan 21 nafar shaxsning bir nafari, Paxtachi tumandan qidiruvda bo‘lgan 19 nafar shaxsning bir nafari, Samarqand tumanidan qidiruvdagi bo‘lgan 39 nafar shaxsning ikki nafari, Urgut tumanida qidiruvdagi bo‘lgan 56 nafar shaxsning ikki nafari qaytib kelgan.
Oqdaryo tumanida IIB tomonidan qidiruvda bo‘lgan 31 nafar shaxsning bittasi o‘z ixtiyori bilan yashash manziliga qaytib kelgan. Narpay tumanidan 17 nafar qidiruvdagi shaxslarning bir nafari o‘z ixtiyori bilan yashash manziliga qaytib kelgan.
Qidiruvda bo‘lib, O‘zbekistonga qaytgan shaxslarning o‘z ixtiyorlari bilan qaytib kelib, huquqni muhofaza qiluvchi organlariga murojaat qilganliklari inobatga olinib, ularga nisbatan muqaddam qo‘llanilgan “qamoq” tarzidagi ehtiyot choralari o‘zgartirilib, qonunda belgilangan yengillashtiruvchi holatlar qo‘llanilgan.
Viloyat IIB va viloyat prokuraturasi rahbariyati tomonidan hamkorlikda qidiruv yo‘nalishida amalga oshirilgan tadbirlar natijasida viloyat IIB bo‘yicha qidiruvdagi shaxslarning qoldig‘i 2018-yil 1-mart holatiga 1061 nafarni tashkil etgan bo‘lsa, joriy yilning shu davrida esa 824 nafarni tashkil etmoqda.
Izoh (0)