Mudofaa vaziri o‘rinbosari bir guruh harbiy sportchilarni taqdirladi
Kecha, 2-fevral kuni Qurolli Kuchlar davlat muzeyida mudofaa vaziri o‘rinbosari general-mayor Azizbek Ikramov boshchiligida Mudofaa vazirligi Sport klubining 2018-yildagi faoliyati tahlili, muammoli yo‘nalishlar hamda ularning yechimi, 2019-yildagi ustuvor vazifalarga bag‘ishlangan yig‘ilish o‘tkazildi. Bu haqda vazirlik matbuot xizmati “Daryo”ga ma’lum qildi.
O‘tgan yil armiya sportchilari tomonidan 1128 medal, ulardan 271 tasi xalqaro musobaqalarda, 857 tasi respublika bahslarida qo‘lga kiritilgan. Bu 2017-yilga nisbatan salkam ikki barobar ko‘p demakdir.
Yig‘ilishda ayni paytda sportning 19 turi bo‘yicha mashg‘ulotlar olib borilayotgan Sport klubi faoliyatini yanada takomillashtirish, sportchilar yutuqlari salmog‘ini oshirish borasidagi mavjud muammolar ham tilga olingan.
“Joriy yildagi ustuvor vazifalar sifatida 2020-yilda Yaponiyaning Tokio shahrida o‘tkaziladigan XXXII yozgi Olimpiya o‘yinlariga yo‘llanmalarni qo‘lga kiritish, Xitoyning Uxan shahri mezbonlik qiladigan (CISM yo‘nalishi bo‘yicha) VII umumjahon harbiy o‘yinlari, shuningdek, O‘zbekistonda ilk bor o‘tkaziladigan Armiya xalqaro o‘yinlarining ayrim turlariga (“Harbiy-tibbiy estafeta”) puxta tayyorgarlik ko‘rish ekanligi ta’kidlandi”, — deyiladi xabarda.
Tadbir so‘ngida, bir guruh sportchi va murabbiylarga O‘zbekiston mudofaa vazirining III darajali “Namunali xizmati uchun” ko‘krak nishoni, Milliy olimpiya qo‘mitasi, Jismoniy tarbiya va sport vazirligining faxriy unvonlari topshirildi.
