Toshkent shahri Olmazor tumani Achavot mahallasidagi 40-uyda Ikkinchi jahon urushi qatnashchisi Abbos bobo Appanov istiqomat qiladi. Urushdan qaytgach, 60 yillik umrini maorif sohasiga bag‘ishlagan otaxon farzandlari, nevarayu chevaralari davrasida qarilik gashtini surmoqda. U haqda “Daryo”ga Mudofaa vazirligi matbuot xizmati ma’lum qildi.
– Urushga o‘z xohishim bilan ketdim va u men uchun Smolenskda boshlandi, – deydi otaxon. – Bombardimonlardan birida xushimdan ketdim. Dala gospitalida o‘zimga keldim. Bildimki, kontuziya bo‘libman. Tuzalib chiqqach 2-belorussiya frontiga qo‘shildim. Belorussiyani ozod qilgach, Polshaga o‘tdik. Uning Lyublin shahrigacha bordik. U yerda 1-Belarus frontida, marshall Georgiy Jukov boshchiligida janglarni davom ettirdik. Germaniyaning Oder daryosini kechib o‘tishda yana yarador bo‘ldim. Berlin ostonasida ham dahshatli janglar bo‘ldi. Shahar butunlay olingach, g‘alabani nishonlash uchun vayronlar ostida qolgan asosiy katta ko‘chalarni o‘zimiz tozaladik. Nemislar avvaliga ko‘chaga chiqishga qo‘rqdi. Keyinchalik do‘stona munosabatimizga javoban tozalash ishlariga hissalarini qo‘shdi. Urush yillarida artilleriya, piyoda qo‘shinlarida xizmat qildim. Germaniyadan 1946-yilning yozida, katta serjant harbiy unvoni bilan uyimga qaytdim.
Urushdan keyin oliygohni tamomlagan otaxon qariyb 60 yil davomida o‘quvchi-talablarga nemis tili fanidan saboq berdi. “O‘qituvchi” nashriyotida ilmiy ishlar olib bordi.
– 1924-yilda Toshkentda, ziyolilar oilasida bosh farzand bo‘lib tug‘ilganman, – deya so‘zida davom etadi nuroniy. – Yetti aka-uka edik. O‘zimning ham yetti farzandim bor. Otam ko‘p yillar matematikadan dars bergan. Men yoshligimdan bilimga chanqoq edim. Yaxshi o‘qiganim sabab, 3-sinfdan keyin 5-sinfga o‘tganman. Kichkina bo‘lishimga qaramay, aholiga lotin alifbosini o‘rgatuvchilar safiga qo‘shib qo‘yishgan. Xonadonma-xonadon yurib, yoshi mendan ham kattalarga saboq berdim. 9-sinfdaligimda, o‘qituvchilarni tayyorlaydigan qisqa kurslarga meni ham jo‘natishdi. Pedagoglar yetishmasdi-da o‘sha paytlari. Chet tili, aniqrog‘i nemis tilini o‘rganish va boshqalarga o‘rgatish ishtiyoqi shunda kuchaydi, menda. Ota kasbini davom ettirdim.
O‘zim maorif sohasida faoliyat ko‘rsatganim uchun, bugungi kunda ta’lim sohasiga berilayotgan e’tibordan juda ta’sirlanaman. Zamonaviy o‘quv maskanlari, u yerlardagi shart-sharoitlarni bir paytlar faqat orzu qilardik. Yoshi ulug‘, keksa avlod vakillarini e’zozlash, ayniqsa Vatan tinchligi yo‘lida jon bergan yurtdoshlarimizning nomini abadiylashtirish borasidagi chora-tadbirlardan ruhim ko‘tariladi. Ming rahmat hukumatimizga...
Olmazor tumani mudofaa ishlari bo‘limi boshlig‘i podpolkovnik A. Sayfitdinov, Qurolli Kuchlar akademiyasi ofitserlari va kursantlari, davlat va jamoat tashkilotlari vakillari ham nuroniy vatandoshimizni sovg‘a-salomlar bilan yo‘qlab, Xotira va Qadrlash kuni bilan qutladi.
Izoh (0)