O‘rmon xo‘jaligi xodimlarining beparvoligi tufayli Nukus tumanida o‘rmonda yong‘in chiqdi

Bahor kelib, kunlar isib borishi bilan fuqarolar tomonidan obodonlashtirish ishlari olib boriladi. Obodonlashtirish ishlarini olib borish davomida quruq o‘t-cho‘plarni yoqib qarovsiz qoldirish natijasida yong‘inlar kelib chiqish holatlari aniqlanmoqda, deb yozadi “KRuz.uz”.

Ayniqsa, o‘rmon xo‘jaligida umuman olov yoqish mumkin emas. Bu haqida fuqarolarni ogohlikka chorlab, o‘rmon xo‘jaligini ko‘z qorachig‘idek asrab-avaylashga javobgar bo‘lgan o‘rmon xo‘jaligi xodimlarining o‘zlari tomonidan olov yoqib, o‘rmonni yoqish holatlari yuz berayotgan bo‘lsa, boshqa fuqarolardan nima kutish mumkin?

QR IIV YoXB Yong‘in texnik laboratoriyasi katta omilkori safdor Aybek Abdirahmanovning xabar berishicha, jami olti nafar o‘rmon xo‘jaligi xodimining beparvoligi sababli Nukus tumani “Arbashi” OFY hududida o‘rmon yong‘ini kelib chiqqan.

5-may kuni soat 12:03 atrofida Nukus tumani “Arbashi” OFY hududidagi o‘rmon xo‘jaligiga tegishli bo‘lgan ekin maydonidagi quruq o‘t-cho‘plarni tozalash maqsadida ular yoqilgan va shamolning kuchayishi olovning Bozatau kanali yoqasidagi yerlarga o‘tib ketishiga sabab bo‘lgan.

Yong‘in natijasida o‘sib turgan daraxtlarga zarar yetgan. Yong‘inning kelib chiqishiga o‘rmon nazoratchisi I.M boshchiligida jami olti nafar o‘rmon xo‘jaligi xodimining beparvoligi sabab bo‘lgan. Natijada keltirilgan zarar 20 million so‘mdan ortiqni tashkil qilmoqda.