Luis Felipe Skolari boshqaradigan “Guanjou Evergrand” ketma-ket oltinchi bor Xitoy chempioni bo‘ldi

Xitoyning “Guanjou Evergrand” klubi mamlakat Super Ligasi chempionligini muddatidan avval hal qildi. Mavsum yakuniga 2 ta tur bor bo‘lsada, 2-o‘rinda borayotgan ta’qibchi Guanjou klubiga yeta olmaydi.

Bu jamoaning ketma-ket oltinchi chempionligi bo‘lib tarixga kirdi. Mana shu olti yil ichida “Guanjou Evergrand” ikki marta Osiyo Chempionlar Ligasida ham zafar quchdi.

Ma’lumot uchun, Guanjou klubini Braziliya bilan jahon chempioni, Portugaliya bilan Yevropa vitse-chempioni bo‘lgan, o‘z vaqtida Toshkentning “Bunyodkor” klubida ishlagan Luis Felipe Skolari boshqaradi.

O‘zbekistonlik futbolchi Anzur Ismoilov harakat qiladigan “Chanchun Yatai” 16 ta klub orasida 15-o‘rinni egallab turibdi. Igor Sergeyev va Yegor Krimets to‘p suradigan “Beytszin Goan” esa 5-o‘rinni egallab turibdi. Mazkur klub chempionat yakuniga qadar 9-o‘ringa sho‘ng‘ishi mumkin, biroq 5-pog‘onadan yuqoriga ko‘tarila olmasligi aniq.