Xonanda Rayhon o‘z konsertiga Yigitalini taklif etish-etmasligi haqidagi savolni javobsiz qoldirdi

23—27-fevral kunlari Toshkent shahridagi “Istiqlol” san’at saroyida xonanda Rayhonning yakkaxon konsert dasturi bo‘lib o‘tadi. “Darakchi”ning xabar berishicha, xonanda o‘z konsertiga farzandlarining otasi — aktyor Yigitali Mamajonovni taklif etish-etmasligi haqidagi savolni javobsiz qoldirgan.

— Konsertning tashkiliy ishlari uchun asablar temirdan bo‘lishi kerak. Bunday holatlarda jahlingizni qanday jilovlaysiz?— Gapingizga qo‘shilaman. Bunday paytda odam o‘ta sabrli bo‘lishi kerak. Agar vaziyat haddan ziyod chuqurlashsa, unda xonaga qamalib olib, yaxshilab yig‘lab olaman va keyin hech narsa bo‘lmagandek yana ishni davom ettiraveraman.

— Odam shunday damlarda yaqin kishilarining ko‘magiga muhtoj bo‘ladi...— Nima demoqchi ekanligingizni tushundim. Hayotimiz davomida kimlarnidir topamiz, kimlarnidir yo‘qotamiz. Shunga qaramay, Xudoga shukr qilib yashash kerak.

— Bu yilgi konsertingizga farzandlaringizning otasini taklif qildingizmi?— ... (xonanda bu savolni javobsiz qoldirishni ma’qul ko‘rdi — “Darakchi”).

Eslatib o‘tamiz, Rayhon 2012-yil noyabrida aktyor Yigitali Mamajonovga turmushga chiqqan edi, 2014-yilning may oyida esa ular egizak farzandli bo‘ldi. 2015-yil yanvarida Rayhon Yigitali bilan ajrashayotganini tasdiqladi.