Rossiya Belarus prezidentiga nisbatan qo‘llangan sanksiyalarning bekor qilinishini ijobiy qabul qildi

Rossiya prezidentining matbuot kotibi Dmitriy Peskov Yevropa Ittifoqi tomonidan Belarus prezidenti Aleksandr Lukashenkoga nisbatan joriy qilingan sanksiyalarning olib tashlanishini ijobiy baholadi. Bu haqda “Vedomosti” nashri xabar bermoqda.

Kecha, 15-fevral kuni Yevropa Ittifoqi Belarus prezidentiga nisbatan 13 yildan buyon ishlab kelgan cheklovlarni qisman bekor qildi.“Biz bu qadamni ijobiy qabul qilamiz, – dedi Peskov jurnalistlar bilan muloqot chog‘ida. – Bu qadam sanksiyalarning ma’nisizligini, sanksion muloqotning istiqboli yo‘qligini, sanksion fikrlashning qusurlarini yana bir bor ko‘rsatib berdi”.

YeI Kengashi, shuningdek, 170 ga yaqin belarus amaldorlari va uchta kompaniyaga nisbatan sanksiyalarning amal qilish muddatini uzaytirmadi. Shu bilan birga, qurol-yarog‘ va politsiya texnikasi yetkazib berish embargosi hamda ayrim viza cheklovlari yana bir yilga uzaytirildi.