O‘zbekistonlik shaxmatchilar Moscow-Open turnirining 6-turida mag‘lubiyatga uchradi

Rossiya Federatsiyasi poytaxti Moskva shahrida shaxmat bo‘yicha nufuzli Moscow-Open 2016 festivali bo‘lib o‘tmoqda. Bu haqda “Olamsport” xabar qilmoqda.

Musobaqaning eng kuchli shaxmatchilari jam bo‘lgan va asosiy turniri hisoblangan “A” guruhida Shamsiddin Vohidov ilk mag‘lubiyatini qabul qilib oldi. Yosh shaxmatchi kecha o‘tkazilgan 6-turda qora donalarda harakat qilib, reytingda o‘zidan ancha yuqorida turgan raqibi rossiyalik grossmeyster Artyom Timofeyevga imkoniyatni boy berib qo‘ydi.

Bu mag‘lubiyatdan so‘ng Vohidov 4,5 ochko bilan qo‘shimcha ko‘rsatkichlarga ko‘ra 13-o‘rinni egallab turibdi. Turnir jadvalida yuz foizlik natija – 6 ochko bilan rossiyalik Yuriy Yeliseyev peshqadamlik qilyapti. Kuchlilar guruhida qatnashayotgan yana bir o‘zbekistonlik shaxmatchi Nodirbek Abdusattorov ham bu turda mag‘lubiyatga uchradi. U qora donalarda rossiyalik grossmeyster Dmitriy Frolyanovdan yengildi. Abdusattorov 3,5 ochko bilan 65-pog‘onadan joy olgan.

Bu turda o‘zbekistonlik shaxmatchilardan Elbek Aliqulov, Roman Golubev va Javlonbek Umarovlar tegishincha rossiyalik Ivan Selivanov, ozarbayjonlik Ahmad Ahmadzoda hamda yana bir mezbon shaxmatchi Vladislav Grigorevni mag‘lub etdi. Timur Igonin, Konstantin Rahmatullayev, Sabohat Zayniddinova, Polina Verbova, Sarvinoz Qurbonboyeva va Gulruhbegim Tohirjonovalar mag‘lubiyatga uchradi.

Eslatib o‘tamiz, o‘zbekistonlik 3 nafar shaxmatchi Moscow-Open turnirining 4-turida g‘alaba qozongan edi.