Toshkent shahridagi “Nargiz Shahzodabonu Savdo” mas’uliyati cheklangan jamiyatining ba’zi sabablarga ko‘ra ishi yurishmay, faoliyatini tugatishga to‘g‘ri keldi. Uning rahbari jamiyatni tugatish uchun tegishli joyga murojaat qildi, deb xabar bermoqda “Huquq” gazetasi.
Murojaat O‘zbekiston Respublikasi sud boshqaruvchilari professional jamoat birlashmasining ikki nafar sud boshqaruvchisi ish yurituviga kelib tushdi. Ular murojaatni qonuniy hal qilib berish o‘rniga nafs yo‘liga borib, bundan foydalanib qolmoqchi bo‘ldi: MChJning faoliyatini tugatish ishlarini tezlatish evaziga 2000 AQSh dollari berishni talab qildi.
Bunday katta mablag‘ni eshitgan jabrlanuvchi sud boshqaruvchilarining tamagirligi haqida tegishli joyga murojaat qildi.
Ariza asosida SVOJJDLQK departamentining Uchtepa tuman bo‘limi tomonidan o‘tkazilgan tadbirda sud boshqaruvchilari xizmat xonalarida 2000 AQSh dollarini pora sifatida olayotganida qo‘lga olindi. Jinoyat ishlari bo‘yicha Uchtepa tuman sudi mansabini suiiste’mol qilgan kimsalarga nisbatan qonuniy jazo tayinlab, hukm chiqardi.
Izoh (0)