Ўзбекистонга Кореядан учинчи Hyundai Rotem тезюрар йўловчи поезди импорт қилинди. Бу ҳақда 21 июнь куни “Темирйўлкарго” АЖ хабар берди.
Қайд этилишича, йирик поездни ташиш жараёни ишлаб чиқарувчи заводдан якуний манзилгача эшикдан-эшиккача тамойили асосида амалга оширилган.
“Замонавий Hyundai Rotem тезюрар поездларининг Ўзбекистонга келтирилиши мамлакатимизда йўловчи ташиш хизматлари сифатини янги босқичга олиб чиқиш ҳамда ички туризм ривожига хизмат қилади”, дейилади хабарда.
Дастлабки поезд 2025 йил 10 декабрда Кореянинг Чангвон шаҳридаги Масан портидан жўнатилган ва 2026 йил февралда Ўзбекистонга етказилганди. Поездга “Жалолиддин Мангуберди” номи берилган. Унинг узунлиги 175 метрни, сиғими учта – VIP, бизнес ва эконом тоифаларида 390 нафарга яқин йўловчини ташкил этади. Поезд етти вагондан иборат бўлиб, соатига 260 километргача тезликда ҳаракатлана олиши маълум қилинган. Май ойида мазкур поезд Тошкент—Урганч—Хива йўналишида қатнай бошлаган.
Аввалроқ транспорт вазири Илҳом Маҳкамов Hyundai Rotem компаниясидан олтита тезюрар поезд сотиб олинишини айтган. Мамлакатга олиб келинган биринич поезд Тошкент—Урганч—Хива йўналишида қатновга қўйилган. Бу орқали йўналишда йўл вақти ҳозирги 14 соатдан 7,5 соатгача қисқаргани маълум қилинган.
Транспорт вазирлиги Hyundai Rotem поездларини Тошкентдан Андижон ва Термизга ҳам йўлга қўйиш устида ишланаётганини билдирган.
