АҚШ президенти Дональд Трамп Ҳормуз блокадасига яқинлашган Эрон ҳарбий кемалари йўқ қилинишидан огоҳлантирди. Бу ҳақда Reuters хабар берди.
Трампнинг айтишича, АҚШнинг Эронга кирувчи ва ундан чиқувчи кемаларга нисбатан блокадаси 13 апрель соат 10:00 да кучга кирган. У олти ҳафталик уруш пайтида Эрон ҳарбий-денгиз кучлари “бутунлай йўқ қилингани”ни айтганди. Аммо янги баёнотида тезкор ва ҳужумкор кемалар нишонга олинмаганини таъкидлади.
“Биз уларнинг оз сонли, тезкор ҳужумкор кемаларига зарба бермадик, чунки уларни катта таҳдид деб ҳисобламадик. Огоҳлантириш: агар бу кемалардан бирортаси бизнинг блокадамизга яқинлашса, улар дарҳол йўқ қилинади, биз денгиздаги қайиқларда гиёҳванд моддалар сотувчиларига қарши ишлатадиган ўлдириш тизимидан фойдаланамиз. Бу тез ва шафқатсиз бўлади”, деб ёзди Трамп.
У сентябрь ойидан бери АҚШнинг Кариб денгизи ва Тинч океанида “наркотик моддалар ташилган” қайиқларга зарба берилиб, 110 киши ўлдирилганини назарда тутди. Эрон АҚШ—Исроил ҳаво ҳужумларига жавобан Ҳормуз бўғозини амалда ёпиб қўйган. Исломободда бўлиб ўтган музокараларда эса томонлар бўғоз бўйича келишувга эришмади. Шундан сўнг Трамп Ҳормузни блокада қилишга буйруқ берди.
“Биз бирор мамлакатнинг дунёни шантаж қилишига ёки товламачилик қилишига йўл қўя олмаймиз”, деди Трамп Оқ уйда журналистларга.
АҚШ раҳбари Эроннинг ядровий интилишларини чеклашга қатъий қарор қилинганини айтди.
“Эрон ҳеч қачон ядро қуролига эга бўлмайди. Агар бунга рози бўлишмаса, ҳеч қандай келишув бўлмайди”, дея таъкидлади АҚШ президенти.
