АҚШ агар Эрон билан келишув муваффақиятсизликка учраса, Ҳормуз бўғози орқали ўтиш учун тўлов жорий этиши мумкин. Бу ҳақда президент Дональд Трамп ўзининг Truth Social ижтимоий тармоғида маълум қилди.
“60 кунлик ўт очишни тўхтатиш даврида Ҳормуз бўғозида ҳеч қандай тўлов ундирилмайди. Агар келишув тўлиқ якунига етказилмаса, ўтган, ҳозирги ва келажакдаги харажатларни қоплаш мақсадида Яқин Шарқ мамлакатларига “ҳимоячи фаришта” сифатида кўрсатилган хизматлар учун АҚШ томонидан ва унинг манфаатлари йўлида жорий этилиши мумкин бўлган йиғимлардан ташқари, ушбу 60 кунлик муддат тугаганидан кейин ҳам ҳеч қандай тўлов бўлмайди”, деб ёзди Трамп.
АҚШ блокадани бекор қилди
Аввалроқ Трамп фармонига мувофиқ, Ҳормуз бўғозини блокада қилиш тартиби бекор қилинган эди. Мамлакат вице-президент Жей Ди Венс бир сутка ичида бўғоздан умумий ҳажми 12,5 миллион баррел нефть ортилган кемалар ўтганини айтган. Бу АҚШ ва Исроилнинг 28 февраль куни Эронга қарши уруши бошланганидан бери энг юқори кўрсаткичдир. Венс Эрон томони “кетма-кет иккинчи тун ҳеч қандай кемани ўққа тутмагани”ни таъкидлаган.
20 июнь куни эса Эрон кемалар ўтишига янги тақиқ жорий этди. Бу қарор Исроил армиясининг Ливан жанубига навбатдаги зарбаларига жавобан қабул қилинди. Шу тариқа, Эрон ва АҚШ ўртасида 17 июнь куни имзоланган, барча фронтларда, жумладан, Ливанда ҳарбий ҳаракатларни тўхтатишни назарда тутувчи меморандумнинг биринчи банди бузилди.
“Агар тажовуз давом этса, душманни ўз мажбуриятларини бажаришга мажбурлаш учун бошқа чоралар кўрилади”, дейилади Эрон ҳарбий қўмондонлиги штабининг Меҳр агентлиги келтирган баёнотида.
АҚШ–Эрон дастлабки келишуви амал қилган уч кун ичида, турли ҳисоб-китобларга кўра, 60–80 та кема Ҳормуз бўғозидан ўтишга муваффақ бўлган. Тинчлик даврида бу кўрсаткич кунига тахминан юзтага етар эди.
