АҚШ президенти Дональд Трамп Эрон энергетика инфратузилмасига зарба беришни яна 10 кунга — 6 апрелгача кечиктирди. Бу ҳақда у Truth Social ижтимоий тармоғидаги саҳифасида маълум қилди.
Трамп бу қарор Эрон томони илтимосига кўра қабул қилинганини айтди.
“Ушбу баёнотни электр станцияларини йўқ қилиш муддатини 10 кунга, яъни 2026 йил 6 апрель, душанба куни шарқий вақт билан соат 20:00 га қадар тўхтатиб туришимнинг тасдиғи сифатида қабул қилишингизни сўрайман. Музокаралар давом этмоқда, фейк ОАВ ва бошқа манбаларнинг нотўғри баёнотларига қарамай, улар жуда яхши ўтмоқда”, деб ёзди Трамп.
Аввалроқ АҚШ президенти агар Эрон Форс кўрфази мамлакатларидан нефть ва газ ташиладиган Ҳормуз бўғози блокадасини бекор қилмаса, энергетика объектларига зарба бериш билан таҳдид қилганди.
Дастлаб Оқ уй белгилаган ультиматум муддати 28 март куни тугаши керак эди. Бироқ 23 мартдаёқ Трамп музокаралар учун зарбаларни беш кунга кечиктирганини айтди. Теҳрон эса Вашингтон билан музокаралар олиб борилаётганини рад этмоқда.
The New York Times маълумотига кўра, Эрон вақтинчалик сулҳга рози эмас, у АҚШ ва Исроил томонидан ҳужум қилмаслик кафолатларини олишни истайди. Шунингдек, Ҳормуз бўғозини очиш учун АҚШнинг Форс кўрфазидаги базаларини ёпиш ҳамда Эронга товон пули тўлаш шартини илгари сурган. Ҳозирда Ҳормуз бўғози орқали фақат Теҳронга дўст бўлган давлатларнинг кемалари ҳаракатлана олади.
