АҚШ президенти Дональд Трамп агар Ҳормуз бўғозидаги Америка кемалари нишонга олинса, Эронни “ер юзидан йўқ қилиш” билан таҳдид қилди. У бу ҳақда Fox News мухбири Трей Йингстга берган интервьюсида маълум қилди.
Маълум қилинишича, гап Ҳормуз бўғозида қолиб кетган савдо кемаларини кузатиб бораётган АҚШ кемалари ҳақида кетмоқда. Улар “Озодлик лойиҳаси”да иштирок этмоқда.
“Мен президент Трамп билан Эрон билан боғлиқ вазият бўйича 20 дақиқа суҳбатлашдим. У ‘Озодлик лойиҳаси’ ва АҚШнинг Ҳормуз бўғозида савдо кемаларини кузатиб бориш бўйича саъй-ҳаракатлари ҳақида гапирди. У Эронга янги огоҳлантириш бериб, агар эронликлар бу ҳудуддаги Америка кемаларига ҳужум қилишга уринса, улар, иқтибос келтираман, ‘ер юзидан йўқ қилинади’, деди”, дея таъкидлади Йингст Fox News эфирида.
Урушни тугатиш бўйича музокаралар қандай кетаётгани ҳақидаги саволга Трамп эронликлар “анча муросага мойил” бўлиб қолганини айтган.
Трамп 3 май куни кечқурун “Озодлик лойиҳаси” ишга туширилганини эълон қилган эди. 4 май куни АҚШ Қуролли кучлари Марказий қўмондонлиги раҳбари, адмирал Бред Купер ҳарбийлар Эроннинг АҚШ ҳарбий ва савдо кемаларига қарата учирган ракета ҳамда дронларини уриб туширганини айтди. Трамп эса АҚШ бир нечта Эрон катерларини ҳам чўктирганини қўшимча қилди.
АҚШ, Исроил ва Эрон ўртасидаги уруш бошланганидан сўнг Трамп Теҳронга бир неча бор ҳалокатли оқибатлар билан таҳдид қилди. Апрель бошида у эронликларни, агар улар Ҳормуз бўғозини очмаса, “дўзах” ва “цивилизациянинг ҳалокати” билан қўрқитганди. Орадан кўп ўтмай, 8 апрель куни АҚШ ва Эрон ўртасида вақтинчалик сулҳ тузилган. Томонлар ўртасида келишилган икки ҳафталик сулҳ 21 апрелда тугаши керак эди, бироқ Трамп охирги муддат 22 апрель оқшоми эканини билдирган. Кейинчалик у Покистон илтимосига кўра сулҳни номаʻлум муддатга узайтирилган ва Эрондан тинчлик музокаралари бўйича таклифлар кутаётганини маълум қилган.
Яқин Шарқда вазият яна кескинлашди: БАА порти ва АҚШ кемаларига ҳужум қилинди
4 май куни минтақада Эрон атрофидаги уруш доирасида ҳарбий ҳаракатлар яна авж олди. БААнинг стратегик муҳим Фужайра нефть порти ва бир нечта АҚШ кемаларига зарбалар берилди. Эронга нисбатан қатъий чоралар кўришни ёқлаб келаётган БАА хавф ҳақида огоҳлантириш берди. Дрон ҳужуми оқибатида Фужайра нефть марказида ёнғин чиқди. БАА ташқи ишлар вазирлиги ҳолат юзасидан баёнот бериб, Эроннинг янги ҳужумларини “хавфли эскалация” ва “қабул қилиб бўлмас тажовуз” деб баҳолади. Вазирлик агрессияга жавоб бериш ҳуқуқини борлигини билдирди. АҚШ эса ҳужумлар ортидан Эроннинг олтита қайиғини чўктирганини эълон қилди.
