АҚШ президенти Дональд Трамп ҳарбий ҳаракатлар қайта бошланишини айтганидан кейин, Эрон уруш кўламини Яқин Шарқ ҳудудидан ташқарига ёйиш билан таҳдид қилди. Бу ҳақда Теҳроннинг 20 май кунги баёнотига таяниб Reuters хабар берди.
Эрон ҳар қандай янги ҳужумга жавобан АҚШ базалари жойлашган Яқин Шарқ давлатларига зарба бериш билан бир неча бор таҳдид қилган эди. 20 май куни эса Ислом Республикаси нишонлар доираси янада кенгайишига шама қилди.
“Агар Эронга қарши агрессия такрорланса, бу сафар ваъда қилинган минтақавий уруш минтақа чегараларидан ташқарига чиқади”, дейилади Ислом инқилоби қўриқчилари корпуси баёнотида.
Трамп “Эпик ғазаб” операциясини оташкесим сабабли тўхтатганига олти ҳафта бўлди. Аммо урушни тугатиш бўйича музокаралар деярли тўхтаб қолган. Эрон шу ҳафтада АҚШга янги таклиф киритди. Бироқ таклифнинг очиқланган бандларида Трамп аввалроқ рад этган шартлар яна такрорланган. Эрон қуйидагиларни талаб қилмоқда:
- Ҳормуз бўғозини назорат қилиш;
- уруш етказган зарарни қоплаш;
- санкцияларни бекор қилиш;
- музлатилган активларни қайтариш;
- АҚШ қўшинларини минтақадан олиб чиқиб кетиш.
Трамп 18-19 май кунлари янги бомбардимон кампаниясини бошлашга жуда яқин келганини айтди. Аммо у Қатар, БАА ва Саудия илтимоси билан бу қарорни сўнгги паллада ортга сурганини маълум қилди.
“Мен бугун қарор қабул қилишга бир соат қолганида уни тўхтатдим”, деди Трамп 19 май куни Оқ уйда журналистларга.
Урушни тугатиш бўйича босим кучаймоқда
Ноябрь ойида бўлиб ўтадиган Конгресс сайловлари олдидан энергия нархининг кескин ошиши Трампнинг Республикачилар партиясига зарар етказмоқда. Шу сабабли Трамп урушни тугатиш борасида босим остида қолган. Апрель ойи охиридаги оташкесимдан бери унинг баёнотлари тез-тез ўзгариб турибди. У гоҳ бомбардимонни қайта бошлаш билан таҳдид қилса, гоҳ тинчлик келишуви яқинлигини айтмоқда.
19 май куни Трамп уруш жуда тез орада тугашини билдирди. Апрель ойида тинчлик музокараларининг ягона раундида АҚШ делегациясига раҳбарлик қилган вице-президент Жей Ди Венс ҳам силжиш борлигини таъкидлади.
“Биз ҳозир анча яхши ҳолатдамиз”, деди Венс Оқ уйдаги брифингда.
