Ўзбекистонга давлат ташрифи билан келган Тожикистон президенти Эмомали Раҳмон Кўксарой қароргоҳида тантанали кутиб олинди.
Президент матбуот хизматининг хабар қилишича, 26 март куни ўтказилган маросимда Шавкат Мирзиёев олий мартабали меҳмонни самимий қутлаб, шоҳсупага таклиф этди. Икки мамлакатнинг давлат байроқлари кўтарилди ва фахрий қоровул саф тортди. Ҳарбий оркестр ижросида Ўзбекистон ва Тожикистон мадҳиялари янгради. Етакчилар фахрий қоровул сафи олдидан ўтиб, расмий делегациялар аъзоларини қутлади. Биргаликда суратга тушилгандан сўнг Ўзбекистон ва Тожикистон президентларининг музокаралари бошланди.
Тантанали кутиб олиш маросимидан лавҳалар
Тожикистон президенти Эмомали Раҳмон 26 март куни Шавкат Мирзиёевнинг таклифига биноан давлат ташрифи билан Ўзбекистонга келди. Уни Тошкент-Ҳумо халқаро аэропортида давлати раҳбари кутиб олди. Икки кунлик ташриф доирасида олий даражадаги музокаралар ҳамда Ўзбекистон ва Тожикистон етакчилари раислигида Олий давлатлараро кенгашнинг биринчи йиғилиши бўлиб ўтади. Бўлажак тадбирлар кун тартибидан Ўзбекистон—Тожикистон дўстлик ва яхши қўшничилик, стратегик шериклик ва иттифоқчилик муносабатларини янада мустаҳкамлаш масалалари ўрин олган.
Шунингдек, бир қатор янги қўшма лойиҳаларни ишга тушириш кўзда тутилган, кўп қиррали ҳамкорликни янада ривожлантиришга қаратилган икки томонлама ҳужжатларнинг салмоқли тўплами имзоланиши режалаштирилган.
