Шавкат Мирзиёев Ўзбекистон—Тожикистон саммитининг иккинчи куни тадбирларида иштирок этиш учун 27 март куни Бухоро шаҳрига келди.
Президент матбуот хизматининг хабар қилишича, Бухоро халқаро аэропортида давлат раҳбари мамлакатда давлат ташрифи билан бўлиб турган Тожикистон президенти Эмомали Раҳмонни кутиб олди. Тантанали кутиб олиш маросимида олий мартабали меҳмон шарафига миллий қўшиқ ва рақслар ижро этилди.
Бухорода етакчилар тарихий обидаларни зиёрат қилади. Саноат корхоналари фаолияти билан танишиш ҳам кўзда тутилган.
Тожикистон президентининг давлат ташрифи биринчи куни
Тожикистон президенти Эмомали Раҳмон 26 март куни Шавкат Мирзиёевнинг таклифига биноан давлат ташрифи билан Ўзбекистонга келди. Уни Тошкент-Ҳумо халқаро аэропортида давлати раҳбари кутиб олди. Ташрифнинг биринчи куни олий даражадаги музокаралар ҳамда Ўзбекистон ва Тожикистон етакчилари раислигида Олий давлатлараро кенгашнинг биринчи йиғилиши бўлиб ўтди. Йиғилишдан сўнг кўп қиррали ҳамкорликни янада кенгайтиришга қаратилган икки томонлама ҳужжатлар имзоланди. Шавкат Мирзиёев ва Эмомали Раҳмон йирик кооперация лойиҳаларини ишга тушириш маросимида иштирок этиб, 10 та қўшма лойиҳани бошлаб берди. Давлат раҳбарлари “Ўзбекистон” халқаро форумлар саройида икки мамлакат санъаткорлари иштирокидаги анъанавий концерт дастурини биргаликда томоша қилди.
