Ҳиндистоннинг Панжоб штати Зиракпур шаҳрида 10 март куни содир бўлган йўл-транспорт ҳодисаси оқибатида Ўзбекистон фуқароси ҳалок бўлди. Бу ҳақда “Дунё” агентлиги хабар берди.
Элчихона маълумотига кўра, ҳодиса шахсий транспорт воситаси иштирокида содир бўлган. Панжоб штатининг ваколатли ҳуқуқни муҳофаза қилиш органлари айбдорларни аниқлаш ва жавобгарликка тортиш мақсадида тергов-суриштирув ишларини олиб бормоқда.
Дипломатик ваколатхона марҳуманинг қариндошлари билан мунтазам алоқада бўлиб, уларга зарур консуллик-ҳуқуқий ёрдам кўрсатмоқда. Шунингдек, йўл-транспорт ҳодисаси юзасидан олиб борилаётган тергов жараёни ҳам назоратга олингани билдирилган.
Элчихона Т.М. (аёл)нинг яқинлари ва қариндошларига оғир жудолик муносабати билан ҳамдардлик билдириб, марҳуманинг жасадини Ўзбекистонга қайтариш бўйича зарур чора-тадбирлар амалга оширилганини маълум қилди.
Дипломатик ваколатхона хориждаги ватандошларнинг ҳуқуқ ва манфаатларини ҳимоя қилиш устувор вазифа эканини яна бир бор эслатиб, Ҳиндистонда мураккаб вазиятга тушиб қолган фуқароларга консуллик, ҳуқуқий ва бошқа ёрдамларни тезкор кўрсатишга тайёр эканини таъкидлади.
10 март куни АҚШнинг Нью Йорк шаҳрида ҳам ўзбекистонлик аёл йўл-транспорт ҳодисаси оқибатида ҳалок бўлганди. Ҳодиса шаҳар Транспорт департаментига тегишли юк машинаси иштирокида содир бўлган.
