Ҳиндистон “Толибон” бошқарувидаги Афғонистон пойтахтида ўз элчихонасини қайта очишини эълон қилди. Бу ҳақда The Independent хабар берди.
Бу қадам Ҳиндистон ва “Толибон” ҳукумати алоқалари тез ривожланаётганидан дарак бермоқда. “Толибон”нинг амалдаги ташқи ишлар вазири Амирхон Муттақий ҳозирда расмий ташриф билан Ҳиндистонда бўлиб турибди. Бу тарихий ташриф давомида у 10 октябрь куни ҳинд ташқи ишлар вазири Субраҳманям Жайшанкар билан учрашув ўтказган.
Жайшанкарнинг айтишича, Ҳиндистон элчихонаси 2021 йил август ойида — “Толибон” Кобулни эгаллаганидан сўнг ёпилган эди. Орадан бир йил ўтиб, 2022 йил июнь ойида Кобулда техник ваколатхона очилган.
“Биз Афғонистоннинг суверенитети, ҳудудий яхлитлиги ва мустақиллигини тўлиқ қўллаб-қувватлаймиз. Ҳамкорлигимиз Афғонистоннинг ривожланиши, минтақавий барқарорлик ва муросага хизмат қилади”, деган Жайшанкар Деҳлида ўтган учрашувда.
Муттақий БМТ томонидан санксиялар остида бўлган “Толибон” етакчиларидан бири бўлиб, унга сафар тақиқи ва молиявий чекловлар қўйилган. Унинг Ҳиндистонга ташрифи БМТ Хавфсизлик кенгаши махсус рухсати билан амалга оширилмоқда. Ташриф аввалига август ойига режалаштирилган эди, бироқ рухсат олиш жараёни бир оз кечиккан.
БМТ Амирхон Муттақийга илк бор 2001-йилда санкция қўлланганди. Бу тақиқ “Толибон”нинг 1990-йиллардаги бошқаруви даврида содир этилган ҳуқуқбузарликлар билан боғлиқ. Ҳозирча БМТ Бош Ассамблеяси “Толибон” ҳукуматини расмий тан олмаган. Шунга қарамай, Хитой, Россия, Покистон, БАА, Индонезия ва Япония каби бир қатор давлатлар Кобулдаги элчихоналарини қайта ишга туширган ёки элчилар тайинлаган.
