AQSHning Nyu York shahrida sodir bo‘lgan YTH oqibatida O‘zbekiston fuqarosi halok bo‘ldi. Bu haqda “Dunyo” axborot agentligi xabar berdi.
Ma’lum qilinishicha, hodisa 10-mart kuni Nyu York shahrida sodir bo‘lgan. Yo‘l-transport hodisasi oqibatida O‘zbekiston fuqarosi Nilufar Komilova vafot etgan.
Dastlabki ma’lumotlarga ko‘ra, hodisa Nyu York shahri Transport departamentiga tegishli yuk mashinasi ishtirokida sodir bo‘lgan.
Qayd etilishicha, O‘zbekistonning shahardagi Bosh konsulxonasi marhumaning yaqinlari bilan doimiy aloqada bo‘lib turibdi. Diplomatik vakolatxona tomonidan zarur konsullik-huquqiy yordam ko‘rsatilmoqda.
Shuningdek, diplomatik vakolatxona Nilufar Komilovaning oila a’zolari va yaqinlariga chuqur hamdardlik bildirib, ta’ziya izhor qilgan.
Eslatib o‘tamiz, 2025-yil dekabrida AQSHning Rod Aylend shtatidagi Braun universitetida sodir boʻlgan otishmada o‘zbekistonlik talaba Muhammadaziz Umurzoqov halok bo‘lgandi.
O‘zbekistonning AQSHdagi vakolatxonalari vakillari marhumning qarindoshlari bilan doimiy aloqada bo‘lib, AQSHning tegishli idoralari bilan hamkorlikda barcha masalalar yuzasidan yaqindan ish olib borgan.
