Англиянинг “Манчестер Сити” клуби футболчилари Чемпионлар Лигасининг 7-тури доирасида Норвегияда “Будё Глимт”га қарши ўтказилган учрашувни стадиондан томоша қилган мухлисларнинг чипта харажатларини қоплаб беришга қарор қилди. Бу ҳақда BBC нашри хабар берди.
Маълумотларга кўра, ушбу баҳс учун сотилган ҳар бир чипта нархи 25 фунт стерлингни ташкил этган. Натижада “Манчестер Сити” футболчилари мухлисларга жами 9 357 фунт стерлинг миқдоридаги маблағни қайтариб беради.
Клуб футболчилари номидан берилган баёнотда мухлисларнинг жамоа учун тутган ўрни алоҳида таъкидланган:
“Мухлислар биз учун жуда муҳим. Улар жамоани уйда ҳам, сафарда ҳам қўллаб-қувватлаш учун дунё бўйлаб саёҳат қилишади ва бу фидойиликни биз ҳеч қачон оддий ҳол сифатида қабул қилмаймиз. Улар дунёдаги энг яхши мухлислардир. Шунингдек, совуқ об-ҳавода ўтган ва биз учун оғир кечган ушбу ўйинда стадионга етиб келиш учун қанча масофа босиб ўтилганини ҳам тушунамиз. Шу сабабли Будёга келган мухлисларнинг чипта харажатларини қоплаб бериш — биз қила оладиган энг кам иш”, дейилади баёнотда.
Маълумот учун, учрашув 20 январь, сешанба куни бўлиб ўтган ва унда “Будё Глимт” 3:1 ҳисобида “шаҳарликлар”дан устун келди.
