Манчестернинг нуфузли Manchester Evening News нашри ўзбекистонлик ҳимоячи Абдуқодир Ҳусановнинг “шаҳарликлар” сафидаги фаолияти ва унинг клубни янада машҳур қилишда кўрсатаётган мислсиз таъсири ҳақида таҳлилий мақола эълон қилди.
Нашрнинг ёзишича, Ҳусанов нафақат Пеп Гвардиола жамоасининг муҳим бўлагига, балки миллионлаб ўзбекистонликларнинг асосий қаҳрамонига айланиб улгурган. Ўзбекистон ўз тарихида илк бор Жаҳон чемпионатига йўлланма олган бир пайтда, Ҳусановнинг Англия Премьер Лигасидаги муваффақиятлари мамлакатнинг халқаро майдондаги нуфузини янги босқичга олиб чиқмоқда.
Абдуқодир Ҳусановнинг 33,6 миллион фунт стерлинг эвазига “Манчестер Сити”га ўтиши ўзбек футболи учун катта воқеа бўлди. Бироқ ушбу трансфер нафақат спорт, балки геосиёсий нуқтайи назардан ҳам кўпчиликнинг эътиборини тортди. Мақолада айтилишича, Ўзбекистон 1991-йилда мустақилликка эришганига қарамай, Россия оммавий ахборот воситалари ушбу трансферни ўз ютуғидек талқин қилишга уриниши мамлакатда бир оз эътирозларга сабаб бўлган. Ҳусановнинг Премьер Лигадаги муваффақияти эса Ўзбекистоннинг жаҳон футбол харитасидаги мустақил ўрнини янада мустаҳкамлади.
Ҳусановнинг “Сити”даги дебюти осон кечмади, бироқ у қисқа вақт ичида ҳақиқий “феникс” каби қайта туғилди. Рубен Диаш ва Йошко Гвардиоланинг жароҳатидан сўнг, Пеп Гвардиола ўзбекистонлик ёш ҳимоячига тўлиқ ишонч билдирди. Ўтган якшанба куни “Эндилд”да кечган “Ливерпуль”га қарши баҳсда ўзининг ишончли ўйини билан барчани ҳайратда қолдирди. Ҳозирда жамоанинг асосий таркибида кетма-кет 10 та учрашувда майдонга тушиб, бу борада жамоада фақатгина Нико Гонсалесдан ортда қолмоқда.
Рақамлардаги портлаш: Ўзбекистон “Сити”ни забт этмоқда
Ҳусановнинг трансфери клубнинг ижтимоий тармоқларидаги кўрсаткичларини бутунлай ўзгартириб юборди. 2025 йил январь ойида унинг трансфери ҳақидаги хабар ҳатто ўша вақтдаги бошқа шов-шувли харидлардан ҳам кўпроқ қизиқиш уйғотган. “Манчестер Сити” мутасаддилари Абдуқодир Ҳусановни трансфер қилаётганда, унинг иқтидорига шубҳа қилишмаган эди, бироқ ижтимоий тармоқлар ва тижорий кўрсаткичлардаги бундай шиддатли ўсишни ҳеч ким башорат қилмаган. Нашрнинг қайд этишича, клубнинг маркетинг бўлими ўзбекистонлик мухлислар томонидан кўрсатилган мислсиз фаолликдан ҳайратда.
Ҳусанов билан шартнома имзолангани ҳақидаги пост эълон қилинганидан сўнг, клубнинг рақамли платформаларида ҳақиқий “портлаш” юз берди. 2025-йилнинг январь ойида Ҳусановнинг трансфери ҳақидаги хабар ўша вақтда Франкфуртнинг “Айнтрахт” клубидан сотиб олинган Омар Мармуш ҳақидаги хабардан ҳам кўпроқ қизиқиш уйғотган. Ҳусанов жамоага келганидан кейинги дастлабки икки ҳафта ичида “Манчестер Сити”нинг YouTube каналини дунё бўйича энг кўп томоша қилган мамлакат Буюк Британия ёки Бразилия эмас, айнан Ўзбекистон бўлган.
2024/25-йилги мавсум якунларига кўра, Ўзбекистондан қайд этилган умумий кўришлар сони 26 миллиондан ошди. Бу кўрсаткич билан Ўзбекистон дунё мамлакатлари ичида 4-ўринга кўтарилиб олди. Эътиборли жиҳати шундаки, Абдуқодир ҳали жамоанинг тўлиқ асосий таркиб ўйинчисига айланиб улгурмаган бир пайтда, клуб веб-сайти ва мобил иловасидан фойдаланувчи ўзбекистонликлар сони қарийб бир миллионга етган.
Трибуналардаги ўзбек овози ва иқтисодий ўсиш
Мухлислар оқими нафақат интернетда, балки бевосита “Etihad” стадионида ҳам сезила бошлади. Охирги икки йил ичида клубнинг Ўзбекистондаги фан-базаси 500 фоизга кенгайди. Бунинг мантиқий давоми ўлароқ, Тошкентда клубнинг расмий мухлислар гуруҳи ўз фаолиятини бошлади.
Клубнинг тижорий бўлимини энг кўп ҳайратлантирган жиҳат эса туризм хизматларига бўлган талабдир. Ҳусанов “Сити” либосини кийганидан бери Ўзбекистондан туриб ўйинларга VIP-пакетлар ва махсус туристик буюртмалар бериш кўрсаткичи 9 бараварга (900%) ошган. Бу шуни англатадики, ўзбекистонлик ишбилармонлар ва футбол ишқибозлари нафақат экранда, балки Манчестернинг ўзида ўз қаҳрамонларини қўллаб-қувватлаш учун катта сармоя киритишга тайёр.
Ҳусановга бўлган қизиқиш нафақат мухлислар, балки йирик бизнес субъектларини ҳам Манчестерга етаклаб келди. “Манчестер Сити” Ўзбекистоннинг энг йирик компанияларидан бири — Artel Electronics билан ҳомийлик шартномасини имзолади. Эътиборли жиҳати шундаки, клуб эмас, балки айнан Artel’нинг ўзи ҳамкорлик ташаббуси билан чиққан ва Ҳусановни ўз брендининг “юзи”га айлантиришни мақсад қилган.
Artel компаниясининг маркетинг директори Нодир Ҳикматиллаев ушбу келишув ҳақида шундай дейди:
“Бугунги ‘Янги Ўзбекистон’ очиқлик, жадал ривожланиш ва юксак умидлар билан ажралиб туради. Биз етакчи ишлаб чиқарувчи сифатида халқимизнинг ана шу интилишларига жаҳон стандартларига мос технологиялар билан жавоб беришни ўз масъулиятимиз деб биламиз”.
Клубдагилар Ҳусановни кореялик Парк Жи Сун ва Сон Ҳён Минлар каби бутун бир мамлакатни ўз ортидан эргаштира оладиган “бренд-футболчи” сифатида кўрмоқда. Ҳатто жамоанинг Чемпионлар Лигаси доирасида Норвегияда бўлиб ўтган “Будё/Глимт”га қарши ўйинини ёритиш учун ўзбекистонлик журналистнинг (Championat.asia нашри журналисти) Шимолий қутб доирасигача етиб боргани клуб матбуот хизматида алоҳида эътироф этилган.
“Гарчи Абдуқодир ҳали жамоадошлари билан мулоқот қилишда тил тўсиғига дуч келаётган бўлса-да, у майдонда энг муҳим тил — футбол тилида мукаммал гапирмоқда. 36 миллионлик Ўзбекистон халқи эса унинг ҳар бир қадамини катта ҳаяжон билан кузатиб бормоқда”, дейилади манбада.
