Тошкент вилояти Бекобод шаҳрида ички ишлар ходими 10 минг доллар пора билан қўлга олинди. Бу ҳақда Ички ишлар вазирлиги хабар қилди.
Қайд этилишича, ички ишлар органлари сафидан бўшатилган қўриқлаш бошқармаси ходими хизматга тикланиши учун ҳамкасбидан ёрдам сўраган. У эса ўзининг юқори турувчи идораларда ишлайдиган танишлари орқали ходимни ишига қайта тикланишида ёрдам беришини айтиб, 10 минг доллар талаб қилган.
Собиқ ходим Шахсий хавфсизлик бош бошқармаси, Тошкент вилояти бўйича бошқармасига ноқонуний ҳолат юзасидан ариза берган.
Ўтказилган тезкор тадбир давомида Бекобод шаҳрида жойлашган ошхоналардан бирининг ёнида ходим талаб қилинган пулларни олган вақтида далилий ашёлар билан ушланди.
Мазкур ҳолат юзасидан Жиноят кодексининг тегишли моддалари билан иш очилиб, ҳозирда тергов ҳаракатлари олиб борилмоқда.
Аввалроқ Фарғонада iPhone телефонларини текширув ва тўловларсиз ўтказиб юбориш учун пора талаб қилган чегара-божхона пост раҳбарига суд ҳукми ўқилганди. Бошқа бир ҳолатда эса Андижонда Ички ишлар бошқармаси ходими ва университет менежери шундай жиноят устида қўлга тушган.
