Тошкент вилоятида икки прокурор пора олаётганда қўлга тушди. Бу ҳақда 8 сентябрь куни Давлат хавфсизлик хизмати хабар берди.
Бош прокуратура ҳузуридаги Иқтисодий жиноятларга қарши курашиш департаментининг Гулистон туман бўлими бошлиғи ва Бекобод шаҳар бўлими катта тезкор вакили фуқародан 25 минг доллар пора олган вақтда ушланган.
Улар пул эвазига иккита ишни ҳал қилиб беришни ваъда берган. Биринчиси, судда кўрилаётган жиноят ишини пора бераётганлар фойдасига ҳал этиб бериш. Яъни Зангиота туманида фаолият юритувчи тўртта МЧЖнинг норасмий раҳбари ва бошқаларга нисбатан Жиноят кодексининг 184-моддаси 3-қисми билан қўзғатилган. Ҳозирда жиноят иши Зангиота туман судида кўрилаётгани билдирилган. Прокурорлар пул учун мазкур ишни ёпишни ваъда қилган. Пора эвазига берилган иккинчи ваъда — Сирдарё вилояти Солиқ бошқармаси томонидан иккита МЧЖда ўтказилган камерал солиқ текширувларини ноқонуний деб топиб бериш бўлган.
“Терговга қадар текширув давомида аниқланишича, ИЖҚКД ходимлари жиноят иши доирасида солиқ текшируви ўтказиш орқали аниқланган зарар миқдорини камайтириш эвазига МЧЖларнинг норасмий раҳбаридан муқаддам 108 минг АҚШ доллари ҳам олишган. Ҳозирда уларга нисбатан Жиноят Кодексининг 168-моддаси 4-қисми “а” банди ва 28,211-моддаси 3-қисми “а” банди билан жиноят иши қўзғатилиб, қамоқ эҳтиёт чораси қўлланилди”, дейилади ДХХ хабарида,
Маълум қилинишича, ҳолат юзасидан тергов ҳаракатлари олиб борилмоқда.
