Фаластиннинг ҳаракати ҲАМАС Исроил томонига низони ҳал этиш ва мустақил Фаластин давлатини барпо этиш жараёни доирасида 5, 7 ёки 10 йилга ўт очишни тўхтатиш ёки тинчлик битими тузишни таклиф қилишга тайёр эканлигини билдирди. Бу ҳақда ҲАМАС сиёсий бюроси аъзоси Басем Наим баёнот берди.
Шунингдек, Наим Фаластин ҳаракати Исроил билан музокараларда вазиятнинг янада кескинлашуви ёки жанг ҳаракатларининг давом этишига йўл қўймаслик учун “ҳар томонлама ёндашув”га тайёрлигини таъкидлаган. У тафсилотларни келтирмасдан, ҲАМАС “қуролларни топшириш ёки музлатиш” масаласини кўриб чиқиши мумкинлигини айтган.“Биринчидан, гап (АҚШ президенти Дональд Трампнинг Ғазо сектори бўйича тинчлик режаси) биринчи босқичини тўлиқ якунлаш, иккинчидан, натижаси мустақил Фаластин давлати бўладиган сиёсий жараённи бошлаш ҳақида бормоқда. Шу давр мобайнида биз 5, 7 ёки 10 йилга ўт очишни тўхтатиш ёки тинчлик битими тузишга тайёрмиз”, деди ҲАМАС вакили Associated Press агентлигига берган интервьюсида.
Бундан ташқари, низо томонлари ўртасида хавфсизлик масалалари бўйича ишончли келишувлар тузилиши кераклигини, улар, хусусан, “фаластинликларга ҳужум қилинган тақдирда ўзларини ҳимоя қилиш имконини бериши” таъкидланган.
5 декабрь куни Al Arabiya телеканали манбаларга таяниб, Ғазо секторидаги низо томонлари ва воситачилар ҲАМАСни қуролсизлантириш бўйича дастлабки қадамлар, жумладан, гуруҳдан оғир қуролларни олиб қўйиш бўйича келишиб олганини хабар қилди.
9 октябрь куни Исроил ва ҲАМАС Миср, Қатар, АҚШ ва Туркия воситачилигида Трамп тақдим этган тинчлик режасининг биринчи босқичини амалга оширишга келишиб олди. Ғазо секторида ўт очишни тўхтатиш режими 10 октябрдан кучга кирди. Исроил қўшинлари келишувга мувофиқ “сариқ чизиқ”қа чекиниб, анклавнинг 50 фоиздан ортиғини ўз назорати остида сақлаб қолди. 13 октябрь куни ҲАМАС гаровга олинган 20 нафар тирик исроилликни озод қилди ва 28 нафар асирдан 4 нафар ҳалок бўлганларнинг жасадларини топширди. 5 декабрь ҳолатига кўра, анклавда 2023 йил 7 октябрда ҳалок бўлган битта исроиллик ҳарбийнинг жасади қолмоқда.
Американинг Axios портали хабарига кўра, Трамп 25 декабргача Ғазо секторида вазиятни тартибга солишнинг иккинчи босқичини амалга ошириш бошланганини эълон қилишни режалаштирмоқда. Битимнинг иккинчи босқичи Исроил қўшинларини анклавдан олиб чиқиш, “халқаро барқарорлаштирувчи кучлар”ни жойлаштириш, шунингдек, секторни бошқариш бўйича тузилмалар, жумладан “Тинчлик кенгаши” фаолиятини бошлашни назарда тутади.
