АҚШ президенти Дональд Трамп якшанба куни Яқин Шарққа келиб, ўз тинчлик режаси асосида Исроил ва ҲАМАС ўртасида эришилган келишувларнинг бажарилишини шахсан кузатади. Бу ҳақда Мисрнинг “Ал-Араби ал-Жадид нашри хабар бермоқда.
Трамп айнан қайси давлатга келиши манбалар томонидан айтилмаган. Бироқ, ҳозирча якшанба куни Трамп келишувларнинг бажарилишини назорат қилиши ва Ғазодаги уруш тўхтатилганини расман эълон қилиши маълум.
Нашр манбасига кўра, куннинг иккинчи ярмида ҳужжат Исроил ҳукумати томонидан тасдиқланиши кутилмоқда, шундан сўнг ҲАМАС озод қилиши лозим бўлган гаровга олинганлар рўйхати ва Исроил қўшинларини Ғазодан олиб чиқишнинг биринчи босқичи харитаси эълон қилинади.
Қўшинларни аҳоли яшайдиган ҳудудлардан амалда олиб чиқиш пайшанба куни кечқурундан бошланиб, шанба кунигача давом этади.
Душанба куни Миср, Туркия, Қатар ва АҚШ назорати остида асирлар алмашинуви бошланади. Исроил фаластинлик маҳбусларни озод қилади ва ўнлаб ҲАМАС жангариларининг жасадларини топширади, улар орасида махсус бўлинмалар аъзолари ҳам бор.
Шунингдек, Исроил биринчи босқичда 2000 дан ортиқ фаластинлик маҳбусни, жумладан, умрбод қамоқ жазосини ўтаётган 250 кишини озод қилиши айтилмоқда. Ўз навбатида, ҲАМАС 20 нафар тирик исроиллик гаровга олинганларни бир партияда топширади ва алмашинувнинг кейинги босқичлари қўшинларни сектордан босқичма-босқич олиб чиқиш билан параллел равишда амалга оширилади.
Бундан ташқари, келишувда Ғазода гуманитар ва фавқулодда ёрдам учун дарҳол бешта ўтказиш пунктини очиш ва Исроил қўшинлари олиб чиқиладиган ҳудудни кенгайтириш кўзда тутилган. Манбаларга кўра, ушбу ўзгартиришлар Фаластин делегациясининг асосий талаби бўлган.
Келишув амалга оширила бошлагач, секторнинг жанубий қисмидан кўчирилган аҳоли Ғазо шаҳрига ва анклавнинг шимолий қисмига қайтиши мумкин бўлади. Шунингдек, гуманитар карвонлар учун йўл тўлиқ очилади. Дастлабки кунларда ёрдам билан кунига 400 га яқин юк машинаси келиши кутилмоқда, кейинчалик бу ҳажм 600 тагача ва ундан ҳам кўпроққа ошади.
