АҚШ президенти Дональд Трамп Truth Social ижтимоий тармоғидаги саҳифасида Исроилни Ғазо секторига нисбатан амалга оширилаётган бомбардимонларни зудлик билан тўхтатишга чақирди. Унинг таъкидлашича, бу чора гаровдаги шахсларни хавфсиз ва тез озод қилиш имконини яратади.
Президент Трамп Фаластиннинг ҲАМАС ҳаракати томонидан билдирилган “узоқ муддатли тинчликка тайёрлик” ҳақидаги баёнотга ишора қилар экан, Яқин Шарқда барқарор тинчликни таъминлаш зарурлигини алоҳида таъкидлади.
“Исроил Ғазони бомбардимон қилишни дарҳол тўхтатиши керак, шунда биз гаровдагиларни хавфсиз ва тез олиб чиқишимиз мумкин. Ҳозир буни амалга ошириш жуда хавфли. Биз аллақачон ишлаб чиқилиши лозим бўлган тафсилотларни муҳокама қилмоқдамиз. Гап фақат Ғазо ҳақида эмас, балки Яқин Шарқда узоқ кутилган тинчлик ҳақида кетмоқда”, — деди Трамп.
Фаластин ҲАМАС ҳаракати сиёсий бюроси раҳбари ўринбосари Мусо Абу Марзук эса ўз баёнотида, Трамп томонидан таклиф этилган режа асосида гаровдаги шахсларни озод қилиш Ғазо секторидаги мавжуд шароитларда амалга оширилиши мумкин эмаслигини билдирди.
Мазкур баёнотлар Ғазо секторидаги вазият ва халқаро тинчлик музокаралари юзасидан долзарб муҳокамаларни янада кучайтириши кутилмоқда
Шунингдек, Абу Марзук Оқ уй раҳбари режасининг бандларини амалга ошириш тафсилотлар ва тушунтиришларни талаб қилишини таъкидлаган.
Бундан аввал ҲАМАС Трамп режасига мувофиқ барча асирларни озод қилишга тайёрлигини маълум қилганди.
Шунингдек, ҳаракат Ғазо секторини бошқаришни фаластинлик технократлардан иборат мустақил ҳокимият органига топширишга рози бўлган.
3 октябрь куни Трамп, агар ҲАМАС 5 октябрь кечгача унинг тинчлик режаси шартларини қабул қилмаса, “мисли кўрилмаган дўзах” билан таҳдид қилган. Унинг таъкидлашича, Яқин Шарқда тинчлик у ёки бу тарзда ўрнатиладi.
