АҚШ президенти Дональд Трамп 16 октябрь куни Россия президенти Владимир Путин билан телефон орқали мулоқот қилди. Давлат етакчилари яқин келажакда Венгрия пойтахти Будапештда учрашишни режалаштирмоқда. Бу ҳақда BBC хабар берди.
Трамп ва Путин охирги марта 15 август куни Аляскада юзма юз учрашган эди. Телефон суҳбати эса учрашувдан кейинги илк мулоқот бўлди. Ўшандан бери Трамп Россия Украинага қарши урушни тугатишга интилмаётганидан норозилигини бир неча бор билдирди. Шунингдек, Американинг узоқ масофали Tomahawk қанотли ракеталарини Киевга етказиб беришга ваъда берди.
Олдиндан эълон қилинмаган телефон суҳбати Трампнинг 17 октябрь куни Украина президенти Владимир Зеленский билан учрашувидан бир кун олдин бўлиб ўтди. Президентлар Tomahawk ракеталарини етказиб беришни муҳокама қилиши кутилмоқда.
Телефон суҳбати Москва ташаббуси билан амалга ошди
Россия президенти матбуот котиби Юрий Ушаковнинг айтишича, Путин телефон орқали суҳбатда Трампни Киевга ушбу ракеталарни етказиб бериш Россия ва АҚШ муносабатларига жиддий зарар етказиши, шунингдек, Украинадаги вазиятни ҳал қилиш истиқболларига салбий таъсир кўрсатиши ҳақида огоҳлантирган. Қўнғироқ Москва ташаббуси билан амалга оширилган ва икки соатдан ортиқ давом этган.
“Президентлар навбатдаги шахсий учрашувни ўтказиш имкониятини муҳокама қилди. Бу жуда муҳим масала. Икки давлат вакиллари кечиктирмасдан, масалан, Будапештда ташкил этилиши мумкин бўлган саммитга тайёргарлик кўриш масалалари билан шуғулланишлари келишиб олинди”, деди Ушаков.
Венгрия бош вазири Виктор Орбан ўз ҳудудида бўлиб ўтадиган учрашув режаларидан хабар топгач, у ҳам Трамп билан телефонда гаплашганини айтди.
“АҚШ-Россия саммитига тайёргарлик бошланмоқда. Венгрия — тинчлик оролидир!”, деб таъкидлади Орбан.
Унинг сўзларига кўра, “Америка ва Россия президентларининг режалаштирилган учрашуви сайёрадаги тинчликни истовчи барча инсонлар учун ажойиб янгиликдир”.
“Бу жуда яхши, самарали суҳбат бўлди. У икки соатдан ортиқ давом этди. Путин президент Трампни Исроил ва Ғазо ўртасидаги можарони ҳал этгани ҳамда Яқин Шарққа тинчлик олиб келгани билан табриклади”, деди Оқ уй матбуот котиби Каролин Левитт.
Унинг айтишича, Путин АҚШнинг биринчи хоними Мелания Трампга ушбу “шафқациз можарода” жабрланганлар украиналик болаларга ғамхўрлик кўрсатгани учун миннатдорлик билдирган.
“Бугунги суҳбат давомида катта ютуқларга эришилди деб ўйлайман...Биз, шунингдек, Украина билан уруш тугагандан сўнг Россия ва АҚШ ўртасидаги савдо-сотиқ қандай бўлиши ҳақида узоқ муҳокама қилдик”, деб ёзди Трамп ўзи Truth Social ижтимоий тармоғида.
Трамп ва Путин учрашуви яқин икки ҳафта ичида бўлиб ўтиши мумкин
Президентларнинг шахсий учрашуви келаси ҳафта Россия ва АҚШнинг юқори даражадаги делегациялари учрашганидан сўнг бўлиб ўтади. АҚШ номидан давлат котиби Марко Рубио иштирок этади, учрашув жойи ва Россия делегацияси таркиби ҳали аниқланмаган. Трамп суҳбатни жуда самарали деб атаган ва натижада “сезиларли муваффақият”га эришилганини қўшимча қилган.
