Украина президенти Владимир Зеленский ва Россия президенти Владимир Путин ўртасидаги нафрат тинчликка эришиш жараёнини жуда қийинлаштирмоқда. Бу ҳақда АҚШ президенти Дональд Трамп “Америка қалқони” минтақавий саммитининг очилишида маълум қилди. Унинг нутқи Оқ уйнинг YouTube каналида трансляция қилинди.
“Мен саккизта урушни тугатган одамман. Ўйлайманки, бизни яна биттаси кутиб турибди”, деди у.
Трампнинг сўзларига кўра, тинчлик музокаралари бир неча бор ўз мақсадига эришиш арафасида бўлган, бироқ ҳар сафар ё Украина, ё Россия ортга чекинган.
“Путин ва Зеленский ўртасидаги зиддият кучли, шу боис келишувга эришиш қийин. Вазият ҳозирча кузатилмоқда. Аввал ҳам келишувга яқин ҳолатлар бўлган, аммо томонлар навбат билан ортга чекинган”, деб қайд этган Оқ уй раҳбари.
АҚШ президенти ҳар икки томон ҳам улкан талафотларга учраётганини қўшимча қилган.
“Бу ҳолат бизга катта таъсир қилмайди, чунки орамизни океан ажратиб турибди. Мен буни Европа ва умумий фаровонлик учун қилмоқдаман”, дея таъкидлаган АҚШ президенти.
Аввалроқ Трамп Зеленскийнинг зиддиятни тугатиш учун келишув тузишни истамаётганидан бир неча бор ҳайратланганини билдирганди.
Ўз навбатида Россия Аляскадаги саммитда икки етакчи эришган келишувларга, жумладан, ўз миллий хавфсизлигига таҳдид солаётган можаронинг асосий сабабларини бартараф этишга таяниб, Украина инқирозини музокаралар йўли билан ҳал қилишга тайёрлигини бир неча бор маълум қилган.
5 март куни Трамп Зеленский Украинадаги можарони ҳал қилишга тўсиқ бўлаётганини айтган эди. Шу билан бирга, у Россия президенти Владимир Путин келишув тузишга тайёрлигини таъкидлаган.
Ўша куни Трамп Зеленский “ишга киришиб”, можарони тинч йўл билан ҳал қилиш бўйича битим имзолаши кераклигини билдирган. Унинг таъкидлашича, Украина етакчисининг қўлида “янада камроқ имконият” қолган.
13 март куни Зеленский Трампни Россияга қарши санкцияларни юмшатгани учун қоралади. Унинг фикрича, бундай ҳаракатлар можарони ҳал қилишга ёрдам бермайди.
