Украина Қуролли кучлари бош штаби бошлиғи Андрей Гнатов Украина ва Қўшма Штатлар бош штаблари даражасида ҳарбий ҳужжат келишиб олинганини маълум қилди. Ушбу ҳужжат, жумладан, Украина Қуролли кучларини қўллаб-қувватлаш масалаларини ҳам ўз ичига олади.
Гнатовнинг таъкидлашича, АҚШ билан икки томонлама иш олиб борилган. Натижада тўрт бўлим ва тўрт иловадан иборат ҳужжат ишлаб чиқилган. Мазкур бўлимлар Украина ва унинг қуролли кучларини қандай қўллаб-қувватлаш, шу жумладан, уларни тиклаш ва модернизация қилиш масалаларини тавсифлайди
Шунингдек, ҳужжатда келишувларга риоя этилишини назорат қилиш ва шартнома бузилиши эҳтимолларига жавоб бериш механизмлари ҳам кўзда тутилган.
Бундан ташқари, Гнатов ҳозирда Украинанинг бошқа ҳамкор давлатлари билан ҳам шундай ишлар олиб борилаётганини қўшимча қилган.
АҚШ президенти Дональд Трамп 28 декабрь куни Флоридадаги Мар-а-Лаго шаҳрида Владимир Зеленский билан учрашди. Шундан сўнг Трамп Украинада тинчлик ўрнатиш бўйича келишув асослари аллақачон мавжудлигини айтди.
Бундан олдин The New York Times газетаси АҚШ президенти Дональд Трамп Владимир Зеленскийга у эришмоқчи бўлган кўринишдаги хавфсизлик кафолатларини бермаслигини ёзганди.
Мақолада таъкидланишича, Украина раҳбарининг Ғарб иттифоқчиларидан, жумладан, Қўшма Штатлардан аниқ кафолатлар олишга бўлган кучли истаги охир-оқибат ҳеч қандай натижа бермайди. Муаллифнинг ёзишича, ҳатто Трамп Украина бўйича бирон-бир мажбуриятни олган тақдирда ҳам, уларни бажариш заруратидан қочиш учун бу мажбуриятларни осонгина бошқара олади.
