Россия Украинада сайлов ўтказиш талаби орқали ҳокимият алмашувини кўзламоқда. Уруш шароитида сайловни ташкил этиш учун камида икки ойлик сулҳ зарур. Бу ҳақда президент Владимир Зеленский британиялик журналист Пирс Морганга берган интервьюсида маълум қилди.
Украинанинг айрим ҳамкорлари ундан президентлик сайлови ва баҳсли ҳудудлар бўйича референдум ўтказишни талаб қилмоқда.
Ўйлайманки, ҳамкорларимиз битта саволга жавоб бериши керак: улар нимани хоҳлайди? Улар ростдан ҳам сайловни хоҳлаяптими ёки шунчаки мени алмаштиришмоқчими? Ўйлашимча, россияликлар шунчаки мени бошқага алмаштирмоқчи, деди Зеленский.
У бунинг учун Россия “жисмоний йўқ қилиш ёки бошқа қадамлардан” фойдаланиши мумкинлигини таъкидлади. Бунинг замонавий йўли эса сайловлар ўтказиш талаби эканини айтди.
Мен ҳеч қачон америкаликларнинг бизга тинчликни қайтариб берадиган таклифларини блоклаб қўймаганман. Агар икки ойлик ўт очишни тўхтатиш бўлса, мен парламент билан гаплашиш ва уларни — ҳатто жамият қўллаб-қувватламаётган бўлса ҳам — уруш пайтида сайлов ўтказишга кўндириш учун қўлимдан келганини қиламан, деди президент.
Зеленский икки ойлик сулҳ бўлса ҳам, бу уруш тугаганини англатмаслигини таъкидлади. У россияликлар америкаликларга бир ёки икки ҳафта ичида сайлов ўтказа олишини айтаётганига эътибор қаратди.
Унинг айтишича, парламентда кўплаб партиялар бор ва ҳатто уруш даврида ҳам турли масалалар бўйича қарашлар фарқланади. Парламентга шунчаки босим ўтказиб бўлмайди, депутатлар билан гаплашиб, сайловлар нима учун кераклигининг ҳақиқий сабабларини тушунтириш керак.Йўқ, улар доимо бир нарсани унутади: биз — Россия эмасмиз, деди Украина президенти.
Биринчи кучли қадамни ташланг, сайловлар учун икки ойга ўт очишни тўхтатиш талаби билан Россияга босим қилинг. Улар (америкаликлар) “уй ишлари”ни бажариши керак. Сайловлар ўтказиш мавзусини уларнинг ўзи кўтарган, деди Зеленский.
Украина қонунларига кўра, ҳарбий ҳолат даврида президент ва парламент сайловлари ўтказилмайди. Россия босқини сабабли мамлакатда бу сайловлар белгиланган муддатларда ўтказилмади. Россия ҳукумати эса бундан фойдаланиб, Зеленскийнинг “ноқонуний президентлиги” ҳақида баёнотлар бериб келмоқда.
2025 йил декабрида АҚШ президенти Дональд Трамп тинчлик музокаралари фонида Украина президентлик сайловини ташкил этиш “вақти келганини” айтганди. Ўшанда Зеленский АҚШ ва Европа хавфсизликни таъминласа, 60–90 кун ичида сайлов ўтказишга тайёрлигини билдирган.
Февраль ойида Financial Times манбаларга таяниб, Зеленский президентлик сайлови ва референдумни Россия билан уруш бошланганининг тўрт йиллиги — 24 февраль куни эълон қилиши мумкинлигини ёзган эди. Украина президенти бунга жавобан “бу ҳақда биринчи марта эшитаётгани”ни қайд этган.
