Ўзбекистон президентининг ташқи сиёсат бўйича маслаҳатчиси, тажрибали дипломат Абдулазиз Комилов Ўзбекистон томони Ғазода бўлаётган хунрезликларни тугатиш борасида АҚШ президенти Трамп билан ҳамфикр эканини айтиб, “Бу борада президент Трамп билан дунёқарашимиз яқин”, деди. Бу ҳақда у “Давра” подкастида гапирди.
Президент Трамп билан дунёқарашимиз, муносабатларимиз регионал, минтақавий ва халқаро масалаларда бир-бирига жуда яқин. Битта мисол келтираман. Муҳтарам президентимиз ўткир ва кескин масала — Ғазода бўлаётган воқеаларни кўтарди. Қарама-қаршилик ва зўравонликни тўхтатиш керак деган таклиф билан чиқди. Бошқа давлатлар айтаётганидек, у ерда очиқдан-очиқ геноцид бўляпти. АҚШ президенти икки-уч кун олдин янги ташаббус билан чиқди. Мен Яқин Шарқда кўп йил ишлаганман, ўйлайманки, бу ташаббусларни қўллаб-қувватлаш мумкин. Ҳозир йирик, катта араб давлатларининг раҳбарлари ҳам буни қўллаб-қувватлаяпти. Агар мана шу жараён ривожланиб, Ғазода тинчлик ўрнатилса президентимизнинг муносабати ва позицияси АҚШга жуда яқин экани кўринади. Шунинг учун нафақат бизнес доирасида, бошқа йўналишларда ҳам биз кенг ҳамкорлик қиляпмиз, деди президент маслаҳатчиси.
Абдулазиз Комилов Шавкат Мирзиёев давлат раҳбарлигига келганда, Ўзбекистон давлати қўшнилари билан ўзаро ишонч масаласида жуда оғир вазиятда бўлганини айтмоқда.
Ўзбекистон президентининг ташқи сиёсат бўйича маслаҳатчиси, тажрибали дипломат Абдулазиз Комилов аввалроқ мамлакатнинг АҚШ билан муносабати Шавкат Мирзиёевга қадар жуда заиф бўлганини гапириб берганди.Ҳурматли Шавкат Миромонович президентликка келганларида, олдиларида жуда мураккаб масалалар, муаммолар бор эди. Энг асосийси нимадан иборат эди? Биз йўқотган энг муҳим, энг қимматли нарса — бу қўшнилар билан бўлган ўзаро ишонч эди. Ўзаро ишонч йўқолганидан кейин уни янгидан тиклаш осон иш эмас. Йиғилган масалаларни ҳал қилиш учун олдин мана шу алоқаларни яқинлаштириш, ўзаро ишончни тиклаш керак эди. Нега деганда, тўсатдан бориб: “Қани, келинглар, ўтиринглар, чегара бўйича бир гаплашиб олайлик”, деган билан иш битмайди, тўғрими? Президентимизнинг доно сиёсатлари туфайли ўзаро ишонч тикланди, кўп масалалар ҳал бўлди, деди дипломат.
