Шавкат Мирзиёев амалий ташриф билан Хўжанд шаҳрига етиб борди. Бу ҳақда Президент матбуот хизмати хабар берди.
Аэропортда давлат раҳбарини Тожикистон Республикаси президенти Эмомали Раҳмон кутиб олди. Ўзбекистон раҳбарининг ташрифи шарафига давлат байроқлари кўтарилди. Миллий куй-қўшиқ ва рақслар ижро этилди.
Бугун Ўзбекистон, Тожикистон ва Қирғизистон президентларининг уч томонлама учрашуви бўлиб ўтади.
Кун тартибига мувофиқ, дўстлик, яхши қўшничилик ва стратегик шериклик муносабатларини янада мустаҳкамлаш, савдо-иқтисодий ва маданий-гуманитар ҳамкорликни кенгайтириш масалалари муҳокама қилинади.
Музокаралар якунида Ўзбекистон, Тожикистон ва Қирғизистон давлат чегараларининг туташ нуқтаси тўғрисидаги шартномани имзолаш режалаштирилган.
Президентлар санъат усталари иштирокидаги қўшма концертда ҳам иштирок этади.
Маълумот ўрнида, Хўжанддаги учрашув давлат етакчиларининг тарихдаги илк бор уч томонлама саммитига айланади. Бўлажак саммити уч мамлакат ўртасидаги минтақавий ҳамкорликни мустаҳкамлашда муҳим қадам бўлади. Етакчилар Марказий Осиёда хавфсизлик, барқарорлик ва фаровонликни таъминлашга қаратилган ҳамкорликнинг асосий масалаларини муҳокама қилиши кутилмоқда
