Ўзбекистон президенти Шавкат Мирзиёев 5 октябрь куни бўлиб ўтган телефон орқали мулоқотда Тожикистон раҳбари Эмомали Раҳмонни таваллуд айёми билан табриклади. Бу ҳақда президент матбуот хизмати хабар берди.
Президент ҳамкасбига мустаҳкам соғлик ва бахт-саодат, биродар Тожикистон халқига фаровонлик ва бардавом равнақ тилади. Шунингдек, Тожикистон президентининг мамлакат мустақиллигини мустаҳкамлаш, барқарор тараққиётини таъминлаш ва халқаро нуфузини оширишдаги ўрнини қайд этди.
“Президент Ўзбекистон билан Тожикистон ўртасида дўстлик, яхши қўшничилик ва иттифоқчилик муносабатларини мустаҳкамлашга қўшган шахсий ҳиссасини алоҳида таъкидлади”, дейилади матбуот хизмати хабарида.
Томонлар кўп қиррали шерикликни кенгайтиришнинг долзарб масалаларини кўриб чиқди. Савдо, саноат кооперацияси, транспорт, энергетика, қишлоқ хўжалиги, туризм, маданий-гуманитар алмашинув каби устувор йўналишларни қамраб олган амалий ҳамкорликнинг янги кун тартибини шакллантириш бўйича биргаликдаги ишларни давом эттиришга алоҳида эътибор қаратилди.
Шунингдек, олий даражадаги икки ва кўп томонлама тадбирлар режаси ҳамда кун тартиби муҳокама қилинди. Маʻлумот ўрнида, Эмомали Раҳмон 1952 йил 5 октябрда туғилган. У 1994 йилда Тожикистон президенти лавозимига киришган.
