Тошкент шаҳар ҳокими Жаҳонгир Ортиқхўжаев пойга ишқибози бўлган пойтахт ёшларининг қизиқиши ва таклифларини ўрганиб, улар учун махсус жой ташкил этиш масаласини кўриб чиқиш топшириғини берди.
Пойтахт ҳокими Тошкент шаҳар ИИББ бошлиғи Азиз Тошпўлатовга пойтахт кўчаларида пойга ва дрифт қиладиган автомашина ҳайдовчиларини 5-10 суткага қамаб қўймасдан, улар билан суҳбатлашиб, қизиқишларини ўрганиш кераклигини айтган.
«Биз шуни кўряпмизки, олдимизда бирор муаммо чиқса ёки ички ишлар ходимларининг ишлашига ‘комфорт’ бузилса, тақиқлаш билан ишлаяпмиз. Дрифт қилиш, пойга ўйнашга ёшларда эҳтиёж бор, буни ўрганиш керак», — дейди Ортиқхўжаев.
Ҳоким ёшларнинг қизиқишини ўлдирмаслик, улар учун алоҳида йўналиш ажратиш масаласини кўриб чиқиш зарур, деб ҳисоблайди. «Дунёда бу спорт даражасига чиққан. Биз ҳар нарсага тақиқ қўймасдан, ёшларнинг фикрини олган ҳолда Тошкент шаҳри атрофида кўпгина бўш жойлар бор, масалан, ДОСААФ автомактаб полигонлари бунга мос келади», — дея таъкидлаган у.
Ортиқхўжаевнинг айтишича, ушбу полигон ва йўлаклардан халқаро пойга мусобақаларини ташкил этиш ва сайёҳларни жалб қилиш учун фойдаланиш мумкин. ИИББ бошлиғи бу бўйича таклифлар тайёрлашга ваъда берган. Мавзуга доир:
